Mar 20, 2019

Filmy

Książki

Humor

Kuchnia Ormiańksa

Aktualności

Waluta

Armenia

edit SideBar

Օրեր - Orer.eu

RSS feed: Orer News Site

Թուրքիան ցեղասպանության իրականացման հավանականությամբ երկրների տասնյակում է

Հարութ Սասունյան

«Կալիֆորնիա Կուրիեր» թերթի հրատարակիչ և խմբագիր
www.TheCaliforniaCourier.com

Ըստ ԱՄՆ Հոլոքոստի հուշահամալիր-թանգարանի Վաղ նախազգուշացման ծրագրի՝ Թուրքիան ութերորդն է զանգվածային սպանությունների իրականացման ամենաբարձր ռիսկ ունեցող երկրների շարքում: Ադրբեջանը անճշտորեն ավելի ցածր՝ 87-րդ տեղում է, իսկ Հայաստանը իրավամբ զբաղեցնում է նույնիսկ ավելի ցածր՝ 102-րդ տեղը: Թուրքիան գնահատվում է որպես 11.2 տոկոս կամ իննից մեկ հնարավորություն ունեցող երկիր՝ 2019 թ. նոր զանգվածային սպանությունների իրականացման առումով:

Վաղ նախազգուշացման ծրագիրը հայտարարել է, որ «ցեղասպանությունները երբեք ինքնաբուխ չեն, դրանց միշտ նախորդում են մի շարք վաղ ահազանգման նշաններ: Եթե այդ նշանները հայտնաբերվեն, դրանց պատճառները կարող են վերացվել՝ կանխելով աղետալի առաջընթացի հնարավորությունը»:

Միացյալ Նահանգների Հոլոքոստի հուշահամալիր-թանգարանի հիմնադրման կանոնադրության մեջ, որը գրել է Հոլոքոստը վերապրած Էլի Վիզելը, ասվում է, որ «միայն անցյալի սխալներից սովորելու գիտակցված, ջանադիր փորձը կարող է կանխել դրանց կրկնությունը ցանկացած ռասայական, կրոնական, էթնիկական կամ ազգային խմբի նկատմամբ: Եթե որևէ հուշահամալիր չի արձագանքում ապագայի դեպքերին, նույնպես ոտնահարում է անցյալի հիշողությունը»:

Թուրքիայի կողմից կրկին ցեղասպանություն իրականացնելու բարձր ռիսկը հիմնված է նրա անցյալի և ներկայիս գործողությունների վրա: Թուրքական կառավարությունը ոչ միայն մեկ դար առաջ է իրագործել ցեղասպանություն հայերի, ասորիների և հույների դեմ, այլև շարունակում է զանգվածային սպանություններ կատարել իր փոքրամասնություն հանդիսացող քրդերի դեմ: Ավելի մտահոգիչ է այն փաստը, որ Թուրքիայի ղեկավարները ժխտում են զանգվածային սպանությունների պատմությունը և անամոթաբար մնում են չապաշխարած, ինչը հանգեցնում է մարդկության դեմ նոր հանցագործությունների կատարման…

Թուրքիայի ցեղասպանական ռիսկը թերագնահատված է, քանի որ ուսումնասիրությունը ներառում է միայն երկրի ներսում կատարված զանգվածային սպանությունները, բացառելով միջպետական ​​հակամարտության զոհերին: Քանի որ Թուրքիան ներգրավված է Սիրիայում և Իրաքում քրդերի դեմ լայնածավալ զինված հարձակումներում և սպառնում է ընդլայնել ռազմական գործողությունները Հյուսիսային Սիրիայում, ապա զանգվածային հանցագործությունների կատարման ռիսկը շատ ավելի բարձր է, քան նշված է ուսումնասիրության մեջ:

Վաղ նախազգուշացման ծրագրում բացատրվում է, որ 2016 թ. Թուրքիայում ձախողված հեղաշրջման փորձը բարձրացրել է զանգվածային սպանությունների հնարավորությունը: Ավելի քան 100 հազար զինվորական և քաղաքացիական աշխատողներ հեռացվել են, իսկ տասնյակ հազարավորներ բանտարկվել, շատերը՝ առանց դատավարության: «Այլ [թուրքական ցեղասպանության] ռիսկի գործոնները ներառում են մարդկանց շարժման ազատության բացակայությունը, երկրի անոկրատիկ վարչակարգի տեսակը [բռնատիրական և ժողովրդավարական հատկանիշների խառնուրդ], մեծ բնակչությունը, զանգվածային սպանությունների պատմությունը և շարունակվող հակամարտությունը կառավարության ու քուրդ ապստամբների միջև»:

Թուրք լրագրողը բանտարկվել է ճշմարտությունն ասելու համար

Ստամբուլի դատարանը թուրք լրագրող Փելին Ունքերին դատապարտել է 13,5 ամսվա ազատազրկման, նրան մեղադրելով երկրի նախկին վարչապետին և նրա երկու որդիներին զրպարտելու մեջ: 2018 թ, հունվարի 8-ին նա նաև տուգանվել է 1615 դոլարով:

Ունքերը հոդված էր գրել թուրքական «Ջումհուրիեթ» թերթում, բացահայտելով, որ նախկին վարչապետ Բինալի Յըլդըրըմն ու նրա երկու որդիների ունեն հինգ նավային ընկերություններ Մալթայում: Երկու տարի վարչապետի պաշտոնում աշխատելուց հետո, Յըլդըրըմը դարձավ Թուրքիայի խորհրդարանի խոսնակ: Նա ներկայումս Ստամբուլի քաղաքապետի թեկնածու է նախագահ Էրդողանի «Արդարություն և զարգացում» կուսակցության կողմից:

Յըլդըրըմի ընտանիքի ընկերությունների սեփականությունը Մալթայում բացահայտվել է «Դրախտի փաստաթղթեր»-ի (Paradise Papers) կողմից և տպագրվել է աշխարհի տարբեր թերթերում: Ինչպես ես տեղեկացրել էի 2017 թ. հունիսին գրած իմ հոդվածում, Յըլդըրըմի ընտանիքին են պատկանում 140 միլիոն դոլար արժողությամբ հետևյալ նավային ու այլ օտարերկրյա ունեցվածք.

– 18 նավ (հոլանդական կոնգլոմերատներ՝ մասամբ կամ ամբողջությամբ սեփականացված).

– 1 նավ (Նիդեռլանդների Անթիլյան ընկերություն).

– 4 մալթական ընկերություն.

– 7 սեփականություն Նիդեռլանդներում.

– 8 նավ Նիդեռլանդներում.

– 3 նավ Մալթայում:

Տարօրինակ է, որ Յըլդիրիմի ունեցվածքի բացահայտման համար Փելին Ունքերը միակ պատժված լրագրողն է: Ունքերը հայտարարել է, որ բողոքարկելու է անարդար դատավճիռը, քանի որ Յըլդըրիմը դատարանում ընդունել է, որ օֆշորային տուրքերից ազատ գոտում գտնվող այդ ընկերությունները պատկանում են իրեն: 2017 թ. նոյեմբերին նախկին վարչապետը և նրա որդիները դատի էին տվել Ունքերին, նրան մեղադրելով «պետական պաշտոնյային վիրավորելու և զրպարտելու մեջ»:

Անկախ լրագրողների միջազգային կոնսորցիումի (ICIJ) տնօրեն Ջերարդ Ռայլը դատապարտել է Ունքերի պատժումը որպես «ևս մեկ խայտառակ հարձակում խոսքի ազատության վրա Թուրքիայում»: Ռայլն ավելացրել է. «դատավճիռն անտեսել է «Դրախտի փաստաթղթեր»-ի հետաքննության ճշմարտությունը և կարող է ճնշիչ ազդեցություն ունենալ Թուրքիայում մնացած մամուլի չնչին ազատության վրա: Այս անարդար դատավճիռը կայացվել է արդարացի և ճշմարիտ լրագրությունը լռեցնելու համար: Ուրիշ ոչինչ: ICIJ-ը ողջունում է Փելին Ունքերի հետաքննության մասին խիզախ և ճշմարիտ հաշվետվությունը և դատապարտում է Թուրքիայի նախագահ Ռեջեփ Թայիփ Էրդողանի բռնակալ իշխանության ներքո լրագրողական ազատության այս վերջին հարձակումը»:

«Լրագրողներ առանց սահմանների» կազմակերպության  2018 թ. Աշխարհի ազատ մամուլի ինդեքսում Թուրքիան 180 երկրների շարքում գրավել է 157-րդ տեղը: Այդ կազմակերպությունը Թուրքիային բնութագրել է որպես «աշխարհի ամենամեծ բանտը պրոֆեսիոնալ լրագրողների համար»:

 

Թարգմանությունը՝ Ռուզաննա Ավագյանի

 


ՅԱՆ ԳԻԼԱՆԸ ՇԱՐՈՒՆԱԿՈՒՄ Է ԱՋԱԿՑԵԼ ԳՅՈՒՄՐԻԻ ԵՐԱԺՇՏԱԿԱՆ ԴՊՐՈՑԻՆ

 

«Դիփ Փըրփլ»-ի աշխարհահռչակ վոկալիստ և երգերի համահեղինակ Յան Գիլանը բազմիցս նշել է, որ Հայաստանը համարում է իր հոգևոր հայրենիքներից մեկը: Հայաստանի հետ նրա կապը երկար տարիների պատմություն ունի: Սպիտակի երկրաշարժից հետո Ջոն Դիի նախաձեռնությամբ մի խումբ ռոք աստղեր՝ Յան Գիլանը, Թոնի Այոմին, Բրայան Մեյը, Դևիդ Գիլմորը և այլք, առաջին և միակ անգամ ի մի եկան ձայնագրելու «Դիփ Փըրփլ»-ի «Smoke On The Water» երգն ի նպաստ երկրաշարժից տուժածների:

Մասնակիցներն իրենց խմբերով մեկական երգով ներկայացան «Երկրաշարժի ալբոմում», որը ստացավ ոսկե կարգավիճակ ու անվանվեց «բոլոր ժամանակների լավագույն հավաքածու»: 1990-ին Գիլանն արդեն Հայաստանում էր. նա չորս համերգ տվեց մարզահամերգային համալիրում, կամերային թատրոնում հանդիպեց հայ երաժիշտների հետ, այցելեց երկրաշարժի գոտի:

Երկրաշարժից 20 տարի անց Գիլանը և «Բլեք Սաբբաթ»-ի կիթառահար Թոնի Այոմին կրկին այցելեցին Հայաստան և խորապես ազդվեցին, թե որքան աշխատանք դեռ կա անելու: Նրանք ձևավորեցին «Who Cares»  նախագիծը և ձայնագրեցին նոր երգ՝ «Մտքիցս դուրս» (Out of My Mind): Այս երգից, Հայաստանի ֆիլհարմոնիկ նվագախմբի հետ Գիլանի համերգներից, ինչպես նաև բարեգործական հատկացումներից ստացված գումարները հնարավորություն տվեցին Գյումրիի երեխաների համար նոր երաժշտական ​​դպրոց կառուցել:

Իսկ վերջերս՝ երկրաշարժի 30-ամյակին, Գիլանի պաշտոնական կայքում ֆիլմ է տեղադրվել երգի ձայնագրման մասին: Կայքն առաջարկում է Հայ օգնության ֆոնդին նվիրաբերություն կատարել` օգնելու Գյումրիի Օկտետ երաժշտական դպրոցին գնել նոր գործիքներ և պահպանելու երաժշտական ​​դպրոցը, որ վերաբացմանը նպաստեցին Յան Գիլանը և Թոնի Այոմին:

Աշոտ Գրիգորյան

ՕՐԵՐ-ի կողմից. Հիշեցնենք, որ այս նախագիծը իրականություն դարձավ Մեդիամաքս գործակալության տնօրեն Արա Թադեւոսյանի եւ նրա գործընկերների նախաձեռնության շնորհիվ։

 

Լուսանկարները՝ Մեդիամաքսի


Հայերը, հայկական բիզնեսն աշխարհում ամենուր են, ինչի շնորհիվ համագործակցության ներուժը անհամեմատ մեծանում է

Պաշտոնական այցով Արաբական Միացյալ Էմիրություններում գտնվող Հայաստանի Հանրապետության նախագահ Արմեն Սարգսյանն Աբու Դաբիում այսօր ևս մեկ հանդիպում է ունեցել Արաբական Միացյալ Էմիրությունների պետնախարար Սուլթան Ալ-Ջաբերի հետ՝ քննարկելու տնտեսության տարբեր ոլորտներում համագործակցության հեռանկարները։

Հանրապետության նախագահը նշել է, որ Հայաստանը թեև փոքր երկիր է, բայց հայերը գլոբալ և սերտորեն փոխկապակցված ազգ են: Եվ երբ ինքը, որպես նախագահ, խոսում է համագործակցության մասին՝ նկատի ունի ոչ միայն Հայաստանի Հանրապետությունը, որովհետև հայերը, հայկական բիզնեսն աշխարհում ամենուր են, ինչի շնորհիվ համագործակցության ներուժը անհամեմատ մեծանում է։

Զրուցակիցները պայմանավորվել են, որ որպես առաջին քայլ, ԱՄԷ-ից պատվիրակություն այցելի Հայաստան՝ հնարավորություններին տեղում ծանոթանալու, քննարկումներ ունենալու և եղած առաջարկները գործնական հիմքերի վրա դնելու համար։

Պաշտոնական այցով Արաբական Միացյալ Էմիրություններում գտնվող Հայաստանի Հանրապետության նախագահ Արմեն Սարգսյանն այսօր հանդիպել է ՄՈՒԲԱԴԱԼԱ ներդրումային ընկերության գործադիր տնօրեն Քալդուն Խալիֆա Ալ Մուբարաքի հետ։

ՄՈՒԲԱԴԱԼԱ ներդրումային ընկերությունը հիմնականում գործունեություն է ծավալում բարձր տեխնոլոգիաների, հեռահաղորդակցության, էներգետիկայի, առողջապահության, անշարժ գույքի, ենթակառուցվածքների, կրթության, գիտության ոլորտներում։

Նախագահ Սարգսյանը շնորհակալություն է հայտնել MASDAR–ի տեխնոլոգիաների և գիտության կրթահամալիրում սովորելու համար Հայաստանից ուսանողներին կրթաթոշակ տրամադրելու համար և ցանկություն հայտնել, որ այդ գործընթացը շարունակական լինի։

Զրուցակիցները ջերմ ու բարեկամական մթնոլորտում քննարկել են երկու երկների միջև առևտրատնտեսական, ներդրումային hամագործակցությանը վերաբերող հարցեր։

Որպես ներդրումների համար գրավիչ և հեռանկարային ուղղություններ, նախագահ Սարգսյանը առաջարկել է դիտարկել վերականգնվող էներգետիկայի, տեղեկատվական տեխնոլոգիաների, զբոսաշրջության, հյուրանոցների ու սպասարկումների ոլորտները, որտեղ, նրա խոսքով, կա փոխգործակցության մեծ ներուժ։

Նախագահ Սարգսյանն առաջարկել է նաև ճանաչողական այց կատարել Հայաստան՝ տեղում հնարավորություններին ծանոթանալու և փոխգործակցության ծրագրեր մշակելու համար։

Պաշտոնական այցով Արաբական Միացյալ Էմիրություններում գտնվող նախագահ Արմեն Սարգսյանն այսօր այցելել է «Մասդար Սիթի» (Masdar City) նորարարական քաղաք։

«Մասդար Սիթի»-ն Աբու Դաբիի էմիրությունում կառուցվող քաղաք է։ Այն հաճախ անվանում են նաև ապագայի էկո-քաղաք, որն ամբողջությամբ պետք է սնուցվի արևային և վերականգնվող էներգիայի այլ աղբյուրների միջոցով: Մասդարի քաղաքային զարգացման փիլիսոփայությունը հիմնված է տնտեսական, սոցիալական և շրջակա միջավայրի կայունության պահպանման սկզբունքի վրա: Թափոնների նվազեցման, ջրային պաշարների օգտագործման, էներգաարդյունավետության ոլորտներում նոր լուծումների կիրառման շնորհիվ Մասդարը քաղաքների զարգացման ուղենշային օրինակ է: Միաժամանակ, Մասդարի տեխնոլոգիաների ու կրթության համալիրը, համագործակցելով Մասաչուսեթսի տեխնոլոգիական ինստիտուտի հետ, կրթական նոր հեռանկարներ է բացում տարբեր երկրների, այդ թվում և հայաստանցի ուսանողների համար։

«Մասդար Սիթի»-ի գործադիր տնօրեն Յուսեֆ Ահմեդ Բասելայբի ուղեկցությամբ նախագահը շրջել է Մասդարի տարածքում, հետաքրքրվել ինովացիոն կենտրոնի նախագծերով ու ծրագրերով, դրանց իրականցման հեռանկարներով և կիրառվող նորարարական գաղափարներով։

Նախագահը հանդիպել է նաև Մասդարում կրթություն ստացող հայ ուսանողներ Մարիայի և Արիկի հետ, հետաքրքրվել նրանց կրթական գործընթացով ու ապագայի հետ կապված ծրագրերով։

«Սա իրականում պարզապես քաղաք չէ, այլ տարբեր գաղափարների, մոտեցումների համադրություն։ Սա և՛ քաղաք է, և՛ գիտահետազոտական, կրթական կենտրոն է, միաժամանակ, նաև բիզնես և հիմնադրամ։ Սա նաև մեծ ներդրում է։ Ժամանակին Հայաստանից այստեղ 10-11 ուսանող ենք ունեցել։ Ցավոք սրտի, հիմա նրանց թիվը շատ քիչ է՝ ընդամենը երեք։ Եվ եթե ճիշտ կազմակերպենք, այդ ուսանողները կարող են մեկ կամ երկու տարի հետո վերադառնալ Հայաստան ու այդ նույն գաղափարները կիրառել Հայաստանում»,– նշել է նախագահ Արմեն Սարգսյանը՝ ընդգծելով, որ 21-րդ դարում, որտեղ մենք ապրում ենք, նմանատիպ գաղափարները շատ մեծ տեղ են ունենալու։

«Կարծում եմ՝ սա լավ օրինակ է մի կենտրոնի, որի հետ պետք է անպայման համագործակցենք և ստեղծենք հայկական օրինակը, որը նույնը չի լինի, այլ կլինի ավելի լավը»,- ասել է Արմեն Սարգսյանը։

Հանրապետության նախագահը, պատասխանելով լրագրողների հարցերին, կիսվել է նաև ապագայի քաղաքի մասին իր տեսլականով։

« Այն պետք է մի քանի բաղադրիչ ունենա,-նշել է Հայաստանի նախագահը:-Բաղադրիչներից մեկը շատ էական է՝ ունենալ ամենավերջին ժամանակակից տեխնոլոգիաները։ Երկրորդը, պետք է ունենալ տեսլական, որը պետք է տանի 20-40 տարի առաջ, պետք է պատկերացնել` որտեղ է աշխարհը լինելու տարիներ անց և կառուցել այն հիմքերը, որոնք քեզ այդտեղ կհասցնեն։ Եվ երրորդը՝ օգտագործել մեր ժառանգությունը, փորձառությունը, որն ունեցել ես տարիներ ի վեր։ Պետք է գնաս քո արմատներին, հասկանաս, թե քո տարածքում ինչպես են մարդիկ ապրել, ու չարհամարհես այդ փորձառությունը»:


Չեխ ուսանող Յան Պալախի ողբերգական մահվան 50-րդ տարելիցը

50 տարի առաջ այս օրը Պրահայի Վացլավի անվան հրապարակում ինքնահրկիզվեց  Յան Պալախը եւ 3 օր անց մահացավ։  Պրահայի Կարլի համալսարանի փիլիսոփայության ֆակուլտետեի ուսանողի այս քայլն ուղղված էր Չեխոսլովակիայի օկուպացիային, որ 1968 թվականին իրականացվել էր Վարշավյան ուխտի երկրների զինված ուժերի ներխուժմամբ։ 

Այսօր նրա հիշատակին նվիրված պատարագ մատուցվեց Պրահայի Սուրբ Սալվադոր եկեղեցում։ Պատարագիչն էր կաթոլիկ հայր Տոմաշ Հալիկը։ Նրա ասելով, փիլիսոփայության ֆակուլտետի ուսանողն այս քայլով փորձեց քնից արթնացնել չեխ ժողովրդին՝ ընդդեմ կոմունիստական ռեժիմի։

Հիշատակի միջոցառումներ են անցկացվել  նաեւ Չեխիայի տարբեր քաղաքներում։ Իսկ Չեխական հեռուստատեսությունը եթեր հեռարձակեց Ռոբերտ Սեդլիչկայի »Յան Պալախ» նոր ֆիլմը, որն ի դեպ արդեն 6 անվանակարգերում ներկայացվել է Չեխական կինոքննադատների մրցանակաբաշխությանը։

 

ՕՐԵՐ

 


ԱՆԹԻԼԻԱՍԻ ՄԷՋ ԽՈՐՀՐԴԱԿՑԱԿԱՆ ՆԻՍՏԵՐ՝ ՀԱՅ ՄԱՄՈՒԼԻ ՏԱՐԻ ՀՌՉԱԿՈՒՄԻՆ ԱՌԻԹՈՎ

Արամ Ա. Վեհափառ Հայրապետին «Հայ Մամուլի Տարի» հռչակելուն առիթով, Անթիլիասի մէջ տեղի ունեցան խորհրդակցական հանդիպումներ՝ յառաջիկայ Ապրիլին, զանգուածային լրատուամիջոցներու մէջ գործող գլխաւոր խմբագիրներու եւ մամուլի հեղինակաւոր գործիչներու համահայկական համաժողով կազմակերպելու օրակարգով:

Խորհրդակցութեան մասնակցեցան Հայաստանի լրագրողներու միութեան նախագահ Սաթիկ Սէյրանեան, «Նոյեան Տապան» լրատու գործակալութեան տնօրէն եւ լրագրողներու համահայկական ընկերակցութեան նախագահ Տիգրան Յարութիւնեան, «Ազդակ» օրաթերթի տնօրէն եւ գլխաւոր խմբագիր Շահան Գանտահարեան, «Զարթօնք»ի տնօրէն Սեւակ Յակոբեան, «Արարարտ»ի խմբագիր Աւետիս Փօշողլեան, լաթողիկոսութեան դիւանապետ Խաչիկ Տէտէեան, կաթողիկոսութեան հայագիտական-կրթական գրասենեակի պատասխանատու Ժիրայր Դանիէլեան, Տեղեկատուական բաժանմունքի տեսուչ Պետրոս վրդ. Մանուէլեան:

Խորհրդակցութեան առաջին նիստին Արամ Ա. վեհափառ հայրապետը, կարեւորելով հայ մամուլին դերը՝ անդրադարձաւ այն գլխաւոր գործառոյթներուն, զորս հայ մամուլը իբրեւ առաքելութիւն պէտք է վերաիմաստաւորէ՝ ներկայ ժամանակակաից պայմաններուն լոյսին տես:

Յաջորդող նիստերուն, մամուլի գործիչները քննարկեցին համաժողովի ընդհանուր խորագիրին, նիստերուն եւ զեկուցումներուն համար ձեւակերպելիք թեմաներուն եւ մասնակցութեան ձեւաչափին վերաբերող հարցեր ու կատարեցին առաջարկներ, իբրեւ ուղենիշ նկատի ունենալով վեհափառ հայրապետին հրապարակած պատգամը՝ 2019-ը հայ մամուլի տարի հռչակելու առնչութեամբ:

 


Kus arménské duše – výstava fotografií Josefa Bosáka

*


«Սրընթաց հեղափոխությունները տեղի են ունենալու նաև մեր ամենօրյա կյանքում». Նախագահ Արմեն Սարգսյան

Պաշտոնական այցով Արաբական Միացյալ Էմիրություններում գտնվող Հայաստանի Հանրապետության նախագահ Արմեն Սարգսյանը մայրաքաղաք Աբու Դաբիում մասնակցել է միջազգային խոշոր՝ «Աբու Դաբի կայունության շաբաթ» համաժողովի մասնակից պատվիրակությունների ղեկավարների պատվին տրված ընդունելությանը և հանդես եկել ելույթով։

Շնորհակալություն հայտնելով Արաբական Միացյալ Էմիրությունների ղեկավարությանն ու կառավարությանը հրավերի և համաժողովին մասնակցելու հնարավորության համար՝ Հանրապետության նախագահը մասնավորապես ասել է.

«Մենք բոլորս գիտակցում ենք, որ ապրում ենք 21-րդ դարում, մի դար, որը շատ յուրահատուկ է, որտեղ աշխարհը փոխկապակցված է, որտեղ ամեն բան տեղի է ունենում լույսի արագությամբ։ Սա բացարձակ ուրիշ աշխարհ է։

Երկու-երեք բանի մասին ցանկանում եմ կարճ խոսել։ Առաջինը՝ գլոբալիզացիան։ Կան քննարկումներ, թե գլոբալիզացիան այսօր կանգ է առել։ Ես բացարձակապես համաձայն չեմ դրա հետ։ Գլոբալիզացիան այլևս մակրոգործընթաց չէ, այն միկրոգործընթաց է։ Աշխարհում մարդիկ, առևտուրը, հարաբերությունները, կապերը, տեղեկությունն այնքան փոխկապակցվածեն, որ գլոբալիզացիան շարունակվելու և աճելու է շատ ավելի մեծ արագությամբ։

Երկրորդը, մենք խոսում ենք ինդուստրիալ հեղափոխության՝ չորրորդ ինդուստրիալ հեղափոխության մասին։ Այն, ինչ մենք կունենանք, լինելու է սրընթաց կամ հաստատուն հեղափոխություն, քանի որ տեղի է ունենալու և՛ գիտության, և՛ տեխնոլոգիաների, և՛ առևտրի ոլորտներում, կենսաբանության մեջ, ինչպես նաև մեր վարքագծում։

Սրընթաց հեղափոխությունները տեղի են ունենալու նաև մեր ամենօրյա կյանքում։ Դրանք աշխարհում տեղի են ունենում նաև այսօր, որի օրինակը Հայաստանն է։

Շուրջ մեկ տարի առաջ՝ ապրիլի 9-ին, ես դարձա Հայասանի Հանրապետության նախագահ։ Դրանից օրեր առաջ սկսվել էր հեղափոխություն, սկսվել էր հինգ անձով, այնուհետև նրանք դարձել էին 100, 500, 1000, 5000… Երկու շաբաթվա ընթացքում մենք ունեինք հեղափոխություն, որին մասնակցում էին հարյուր հազարավոր մարդիկ։ Եվ այս ամենը կազմակերպված չէր, այս ամենը քաղաքական ուժը չէր, որ իրականացրեց: Դա «Ֆեյսբուք»-ի հեղափոխություն էր, 21-րդ դարի հեղափոխություն։ Այսինքն, սրընթաց հեղափոխությունները տեղի են ունենալու նաև քաղաքական կյանքում։ Աշխարհը օր օրի դառնում է ավելի ու ավելի ոչ դասական։

Ցանկանում եմ օրինակ բերել քվանտային ֆիզիկայից։ Հարյուր տարի առաջ ֆիզիկոսները հասկանում էին ամեն բան, ինչ տեղի էր ունենում աշխարհում, և կարող էին ամեն բան բացատրել։ Սակայն աստիճանաբար ի հայտ եկան երևույթներ, որոնք նրանք չէին կարող բացատրել, քանի որ դասական մեխանիկայի գաղափարներն այլևս չէին աշխատում, դասական ֆիզիկայի տրամաբանությունը չէր աշխատում։ Եվ այս ամենը շարունակվեց այնքան, մինչև հսկաներից մեկը` Ալբերտ Այնշտայնը, ստեղծեց մի բան, որն առնչվում էր տարրական մասնիկների վարքագծին, ինչը բացարձակապես դասական չէր։

Դասական ֆիզիկայում, որպեսզի մասնիկներն Ա կետից գնային Բ կետ, պետք է անցնեին հստակ ճանապարհով։ Մինչդեռ քվանտային ֆիզիկայում կամ փոքր մասնիկների ֆիզիկայում այդ մասնիկները հավանականության տեսությամբ կարող էին լինել ցանկացած կետում։ Այսինքն, սա բնական աշխարհը դիտարկելու բացարձակ տարբերվող տեսակ է։

21-րդ դարում մենք մուտք ենք գործում համաշխարհային ռիսկերի, ինչպես նաև քաղաքականության քվանտային վարքագծի ժամանակաշրջան։ Սոցիալական, քաղաքական իրադարձությունները 21-րդ դարում բացարձակապես տարբերվող վարքագիծ են ունենալու։ Համաշխարհային ռիսկերի վարքագիծը տեխնոլոգիաների, համաճարակների կամ ահաբեկչության դեպքում ամբողջովին տարբերվելու է 20 -րդ դարի նրանց վարքագծից։ Ռիսկերը, որոնք լինում են Նյու Յորքում կամ Վաշինգտոնում, կարող են ողջ երկրագնդով մեկ մեծ փոփոխությունների պատճառ դառնալ։ Մարդիկ կարող են միլիարդավոր դոլարներ կորցնել։

Հետևաբար, եթե ռիսկերը քվանտային են, դրանց լուծումները ևս պետք է քվանտային լինեն։ Ուստի, բարի գալուստ 21- րդ դար, որտեղ ձեզնից յուրաքանչյուրը պետք է մտածի տարբեր, որտեղ ձեզնից յուրաքանչյուրը պետք է լինի ստեղծարար, ինչպես նաև՝ քվանտային…

Այստեղ ցանկանում եմ կանգ առնել, քանի որ սրանք պարզապես փոքր հատվածներ են իմ գրքից, որն ավարտում եմ: Այն կհրատարակվի գարնանը և կոչվելու է «Համաշխարհային ռիսկերի քվանտային վարքագիծը»»:


Vache Gabrielyan Appointed Dean of the Manoogian Simone College of Business and Economics

*


Լենա Նազարյանը, Ալեն Սիմոնյանը եւ Վահե Էնֆիաջյանն ընտրվել են ՀՀ ԱԺ նախագահի տեղակալներ

Հունվարի 15-ին շարունակվել է ՀՀ ԱԺ յոթերորդ գումարման առաջին նստաշրջանի աշխատանքը: Գաղտնի քվեարկության արդյունքում «Իմ քայլը» խմբակցությունից Լենա Նազարյանը (124 կողմ, 3 դեմ) եւ Ալեն Սիմոնյանը (109 կողմ, 20 դեմ) ու «Բարգավաճ Հայաստան» խմբակցությունից Վահե Էնֆիաջյանն (108 կողմ, 0 դեմ) ընտրվել են ՀՀ ԱԺ նախագահի տեղակալներ:

Մանե Թանդիլյանի թեկնածությանը կողմ է քվեարկել 19 պատգամավոր:

Քվեարկության մեկնարկից առաջ «Իմ քայլը» խմբակցության ղեկավար Լիլիթ Մակունցը հայտնել էր, որ իրենց խմբակցությունը ԱԺ ընդդիմադիր փոխխոսնակի համար ձայն է տալու  մեծ համամասնությամբ ներկայացված թեկնածուին:

 

ՕՐԵՐ

 


Դեսպան Վարուժան Ներսեսյանն իր հավատարմագրերը հանձնեց ԱՄՆ նախագահին

Հունվարի 11-ին ԱՄՆ-ում ՀՀ դեսպան Վարուժան Ներսեսյանն իր հավատարմագրերը հանձնեց ԱՄՆ նախագահ Դոնալդ Թրամփին:

Ողջունելով նախագահ Թրամփին ՀՀ նախագահի, վարչապետի ու ժողովրդի անունից` դեսպան Ներսեսյանը նշեց, որ իր համար մեծ պատիվ ու պատասխանատվություն է Հայաստանը ներկայացնել ԱՄՆ-ում այս կարևոր ժամանակաշրջանում:

Հավատարմագրերի հանձնման արարողության ընթացքում տեղի ունեցած կարճ զրույցի ընթացքում նախագահ Թրամփն ու դեսպան Ներսեսյանը կարևորեցին տարբեր ոլորտներում երկկողմ հարաբերությունների ընդլայնմանն ուղղված քայլերը: Կողմերը շեշտեցին ամերիկահայ համայնքի դերակատարությունը երկու երկրների միջև բարեկամության զարգացման գործում:


Սահակ Սարգսյանը Սևծովյան տնտեսական համագործակցության կազմակերպությունում ՀՀ մշտական ներկայացուցիչ

Հայաստանի նախագահի հրամանագրով Սահակ Սարգսյանը նշանակվել է Սևծովյան տնտեսական համագործակցության կազմակերպությունում Հայաստանի Հանրապետության մշտական ներկայացուցիչ:


Ավստրիայում Հայաստանի դեսպանը նաեւ ՀՀ ներկայացուցիչ ԵԱՀԿ-ում եւ ՄԱԿ-ի կազմակերպություններում

Հայաստանի նախագահի հրամանագրով Ավստրիայում Հայաստանի դեսպան Արմեն Պապիկյանը նշանակվել է Եվրոպայի անվտանգության և համագործակցության կազմակերպությունում Հայաստանի Հանրապետության առաքելության ղեկավար, Վիեննայում Միավորված ազգերի կազմակերպության գրասենյակում և այլ միջազգային կազմակերպություններում Հայաստանի Հանրապետության մշտական ներկայացուցիչ (նստավայրը՝ Վիեննա): 


Արարատ Միրզոյանը միաձայն ընտրվեց 7-րդ գումարման ԱԺ նախագահ

ԵՐԵՎԱՆ, 14 ՀՈՒՆՎԱՐԻ, ԱՐՄԵՆՊՐԵՍ: ՀՀ 7-րդ գումարման Ազգային ժողովի նախագահ ընտրվեց Արարատ Միրզոյանը: «Արմենպրես»-ի փոխանցմամբ՝ այս մասին հունվարի 14-ին ՀՀ 7-րդ գումարման Ազգային ժողովի առաջին նիստի ընթացքում հայտնեց ԱԺ հաշվիչ հանձնախմբի ղեկավար Վահագն Հովակիմյանը:

«Փակ և գաղտնի քվեարկությամբ ԱԺ 132 պատգամավորների 131 կողմ ձայնով ՀՀ Ազգային ժողովի նախագահ է ընտրվել «Իմ քայլը» խմբակցության կողմից առաջադրված թեկնածու Արարատ Միրզոյանը»,- ասաց Հովակիմյանը:

1 քվեաթերթիկ եղել է անվավեր:

Ազգային ժողովի «Լուսավոր Հայաստան» և «Բարգավաճ Հայաստան» խմբակցությունները նախագահի թեկնածու չէին առաջադրել:

 


Մեկնարկել է ՀՀ ԱԺ յոթերորդ գումարման առաջին նստաշրջանի աշխատանքը

Հունվարի 14-ին մեկնարկել է ՀՀ ԱԺ յոթերորդ գումարման առաջին նստաշրջանի աշխատանքը:

Նորընտիր խորհրդարանի անդրանիկ նստաշրջանի բացման առթիվ պատգամավորներին շնորհավորանքի եւ ողջույնի խոսք են հղել Ամենայն Հայոց կաթողիկոս, Ն.Ս.Օ.Տ.Տ. Գարեգին Բ-ն եւ ՀՀ նախագահ Արմեն Սարգսյանը:

«ՀՀ ԱԺ կանոնակարգ» սահմանադրական օրենքի 33-րդ հոդվածի 3-րդ կետի համաձայն՝ նորընտիր պատգամավորները երդվել են:

ԱԺ ընտրությունների արդյունքում խորհրդարան են անցել երեք քաղաքական ուժեր՝ «Իմ քայլը» կուսակցությունների դաշինքը, «Բարգավաճ Հայաստան» եւ «Լուսավոր Հայաստան» կուսակցությունները: Պատգամավորների ընդհանուր թիվը 132 է: «ՀՀ ԱԺ կանոնակարգ» օրենքի համապատասխան հոդվածի դրույթների համաձայն՝ յոթերորդ գումարման խորհրդարանում գործելու է 3 խմբակցություն:

Օրակարգում ընդգրկված է 7 հարց՝ հաշվիչ հանձնախմբի ստեղծում, Ազգային ժողովի նախագահի ընտրություն, Ազգային ժողովի նախագահի երեք տեղակալների ընտրություններ, մշտական հանձնաժողովների ստեղծում, մշտական հանձնաժողովների նախագահների ընտրություններ, Կառավարության առաջարկությամբ Կառավարության կառուցվածքի փոփոխության վերաբերյալ օրենքի նախագծի քննարկում, Կառավարության ծրագրին հավանություն տալու հարց:


Մեր ժողովուրդը մեծ սպասումներ ու ակնկալություններ ունի բարեփոխումների. Գարեգին Բ Ամենայն Հայոց կաթողիկոս

Ն.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ԽՈՍՔԸ
ԱԶԳԱՅԻՆ ԺՈՂՈՎԻ 7-ՐԴ ԳՈՒՄԱՐՄԱՆ ԱՆԴՐԱՆԻԿ ՆԻՍՏԻ ԱՌԻԹՈՎ

Մեծարգո Նախագահ Հայաստանի Հանրապետության,
Հարգելի նախագահող,
Պատվարժան պատգամավորներ և սիրելի ներկաներ,

Ողջունում և Հայրապետական Մեր օրհնությունն ենք բերում ձեզ Ազգային ժողովի 7-րդ գումարման անդրանիկ նիստի առիթով: Արգասաբեր գործունեության մաղթանքով շնորհավորում ենք Ազգային ժողովի նորընտիր պատգամավորներիդ:

Այսօր դուք՝ իբրև վստահյալ ներկայացուցիչները ժողովրդի, ստանձնում եք ձեր պարտականությունները: Հայաստանի նոր կյանքը կերտելու պատասխանատվությունը նաև ձեր ուսերին է, քանզի մեր երկրի առաջընթացն ու զարգացումը մեծապես պայմանավորված է օրենսդիր մարմնի գործունեությամբ:

Մեր ժողովուրդը մեծ սպասումներ ու ակնկալություններ ունի բարեփոխումների: Բարօրության ու կարիքների հոգածության հրամայականը չէ միայն, որ հուզում է մեր ժողովրդին: Մեր երկրի առջև ծառացած են արտաքին հանգամանքներով պայմանավորված լրջագույն մարտահրավերներ, որոնց դիմակայելու և շահեկան կերպով լուծումների առաջնորդելու համար ներքին կյանքում պիտի ունենանք հնարավորինս քիչ խնդիրներ: Պետական, քաղաքական գործիչների և ողջ հասարակության ընդհանուր բարեխղճությունը և քաղաքացիական պատասխանատվությունը գլխավոր պայմանն են մեր ժողովրդի ներուժի համախմբման, մեր պետականության ամրապնդման և մեր շեն, հուսալի ապագայի կերտման:

Հարգարժան պատգամավորներ, ձեր օրենսդրական ջանքերով պիտի ձևավորվեն անհրաժեշտ միջավայր ու հնարավորություններ մեր երկրի տնտեսության շարունակական զարգացման, գիտության, կրթության, մշակույթի առաջընթացի համար, մեր ժողովրդի անվտանգության և խաղաղության ապահովման համար: Ձեր հաստատած օրենքները պիտի ծառայեն հասարակական մեր կյանքում ամրապնդելու օրինականությունը, արդարությունն ու իրավունքը, որոնք կզորացնեն մեր ընթացքը՝ ապրելու և գործելու փոխադարձ հարգանքի, սիրո և համերաշխության մեջ: Սիրո և համերաշխության ոգով, հավատում ենք, պիտի արդյունավորվեն նաև այս դահլիճում ընթացող քննարկումները և կայացվող որոշումները: Քաղաքական հայացքների և տեսակետների բազմակարծությամբ հանդերձ՝ մեր հայրենիքի և ժողովրդի լուսավոր ապագայի նույն տեսլականն է միավորում ձեզ՝ համախումբ ջանքերով ներդրում բերելու ազգային մեր իղձերի իրագործման նվիրական առաքելությանը: Պատվերն ունենք առաքյալի՝ ճշմարտությամբ, արդարությամբ, սրբությամբ, առաքինությամբ ու սիրով խորհելու (Փիլ. Դ 8), միաշունչ և միախորհուրդ լինելու և հակառակության ոգով չգործելու (Փիլ. Բ 2-3): Ճշմարիտ է ասված՝ միաբանությամբ փոքրերը մեծանում են, և անմիաբանությամբ մեծերը՝ փոքրանում: Արդ, ամուր պահենք Հայաստան, Արցախ, Սփյուռք միասնականությունը, հավատարմությունը մեր հոգևոր և ազգային արժեքներին, մեր հայրերի նվիրական պատգամներին, որպեսզի ունենանք շնորհն ու զորությունը կերտելու մեր հայրենիքի և ազգային կյանքի զարթոնքը:

Սուրբ Ծննդյան հոգենորոգ այս օրերին, արդարև, զորանում են հավատն ու վստահությունը, որ քրիստոնեական իր արժեհամակարգով մեր ժողովուրդը պիտի շարունակի լինել արարող ու զարգացող ազգ, հոգով ու մտքով լուսավորված ազգ՝ կարող բարեփոխելու իր կյանքը: Մեր Եկեղեցին, ինչպես բազմադարյա մեր պատմության ընթացքին, այսօր ևս շարունակելու է իր զորակցությունը բերել հայրենի իշխանությունների ազգաշեն նախաձեռնություններին։

Մեծարգո պատգամավորներ, Աստծո օրհնությունն ու շնորհներն ենք հայցում ձեզ և ձեր գործունեությանը: Հայրենիքի հանդեպ ձեր սերը թող ուղղորդի և ուժ ու կորով պարգևի ձեզ: Թող Տերը Իր Սուրբ Աջի և խնամքի ներքո պահպանի ու օրհնի մեր ժողովրդին և սրբազան մեր երկիրը՝ խաղաղության մեջ և բարգավաճման ճանապարհին՝ այսօր և միշտ. ամեն:


RSS

Szukaj

Linki

Telefonia

Reklama

Administracja

Group & Page

Back Links

Stats