Dec 11, 2018

Filmy

Książki

Humor

Kuchnia Ormiańksa

Aktualności

Waluta

Armenia

edit SideBar

Lragir Լրագիր

English

RSS feed: Լրագիր

«Մուրացան» համալսարանական հիվանդանոցում բուժվող երեխաների համար համերգ են կազմակերպել

Այսօր Միրզոյան քառյակի երաժիշտները համերգ են ունեցել «Մուրացան» համալսարանական հիվանդանոցում:

 Ինչպես տեղեկացրին ԵՊԲՀ-ից, Միրզոյան քառյակի երաժիշտները  միավորվել են ԵՊԲՀ ուսանողների, բժիշկների հետ և ապացուցել, որ տոն կարող է լինել նույնիսկ հիվանդանոցում, և դրա համար շատ բան հարկավոր չէ: 

Համերգից հետո երաժիշտներն ուրախացրեցին հիվանդանոցում բուժվող երեխաներին՝ իրենց բերած նվերներով։ Երեխաների ուրախությամբ  ոգևորված էր նաև «Մուրացան» համալսարանական հիվանդանոցի ողջ բժշկական անձնակազմը:

հիվանդանոցի անձնակազմը շնորհակալություն է հայտնում բոլոր այն մարդկանց,  ովքեր տարեվերջյան բազմազբաղ առօրյայում գտնում են ժամանակ, այցելում են համալսարանական հիվանդանոց, և երեխաներին են փոխանցում իրենց դրական էներգիան: 


Դեմ առ դեմ. Նիկոլ Փաշինյանը փաստի առաջ

Դեկտեմբերի 9-ի արտահերթ ընտրությունից հետո հանրության շրջանում արդյունքի քննարկումներին զուգահեռ ավելի ու ավելի նկատելի տեղ են զբաղեցնում հետագա զարգացումների շուրջ դիտարկումները՝ թե կարճաժամկետ, թե միջնաժամկետ, թե երկարաժամկետ առումներով: Հաճախ արվող շեշտադրումն այն է, որ ձեւավորվում է մեկ ուժի գերիշխանություն, ինչը համարվում է խիստ վտանգավոր, եթե չկա հակակշիռ:

Տեսականում այդ մտահոգությունը միանգամայն տեղին է, բայց գործնականում իրավիճակը հավասարազոր կարող է լինել այն բանին, երբ, ասենք, ապրիլ-մայիսին մտահոգություն հայտնվեր, որ չկա փողոց դուրս եկած քաղաքացիներին հակակշիռ:

Որեւէ մեկի մտքով իհարկե չէր անցնի այդ ժամանակ խոսել այդպիսի հակակշռի բացակայության վտանգավորության մասին:

Այն, որ փողոց դուրս եկած քաղաքացիները յոթ ամիս անց մտել են ընտրատեղամասեր, դեռ չի նշանակում, որ նրանք զբաղված են արդեն այլ գործով: Նրանք դե ֆակտո շարունակում են նույն գործը, պարզապես արդեն ապահովելով վերջին՝ տրանսֆորմացիայի փուլը, գործընթացը փողոցից ամբողջությամբ տեղափոխելով կառավարման համակարգ:

Ի դեպ, հատկանշական է, որ դրանից անմիջապես հետո գործնականում փողոց է տեղափոխվում Ռոբերտ Քոչարյանը՝ ի դեմս իր համակիրների, որովհետեւ Քոչարյանն ինքը կալանքի տակ է:

Իսկ ամբողջությամբ կառավարման համակարգ տեղափոխված հեղափոխության գործընթացի քաղաքական հակակշռի խնդիրը դեռ պետք է ձեւակերպվի: Հակակշիռ կա, խնդիրը ձեւակերպումն է, թե որ ուժն է անելու դա:

Իսկ հակակշիռը դա հասարակությունն է, հենց այն հեղափոխությունը, որն արվել է: Նիկոլ Փաշինյանի հեղափոխական-քաղաքական հաջողությունն է հենց նրա նոր քաղաքական կարգավիճակի հակակշիռը: Այդ գործընթացն է սահմանել հանրային պատկերացումների ու գիտակցության նոր նշաձողեր, որոնց պետք է համապատասխանեն քաղաքական ուժերը:

Հակակշիռը նաեւ ժամանակն է, փոփոխվող աշխարհը, արդիականացող տեխնոլոգիաները, որոնք իրենց անխուսափելի հետքն են թողնում հասարակությունների մտածողության, պահանջների, պատկերացումների վրա: Եւ այստեղ տեսա-պատմական համեմատությունները մոտ ու հեռու անցյալի տեղական ու համաշխարհային օրինակների վրա ունեն ոչ ճշգրիտ լինելու վտանգ:

Ի վերջո, Հայաստանում անարյուն, թավշյա հեղափոխությունն իրականանալի է դարձել նաեւ այդ համաշխարհային փոփոխությունների շնորհիվ: Դրանք նվազեցնում են հասարակություններին զսպելու կառավարությունների կարողություններն ու բարձրացնում են հասարակությունների կենսունակությունը, կարողությունները: Տարբեր երկրներում այդ ամենն արտահայտվում է տարբեր դրսեւորումներով, կախված առանձնահատկություններից, բայց ընդհանուր տենդենցը ակնառու է, եւ այդ իմաստով յուրաքանչյուր իշխանության ամենամեծ հակակշիռը ժամանակն է:

Հանրությունները գտնում են դա արտահայտողին, կամ դուրս են բերում արտահայտողին իրենց միջից:

Ադ իմաստով, մտածելու բան ունի ոչ թե հասարակությունը, թե որտեղից գտնի հակակշիռ, այլ այն ուժերը, որոնք այժմ հասարակությանը փորձում են ահաբեկել հակակշռի բացակայության վտանգավոր հեռանկարով, թյուրիմացաբար կարծելով, թե իրենք ավելի են հասկանում իրավիճակից ու այդ խնդրից, քան հանրությունն իր բազմաշերտ հավաքականությամբ եւ ամբողջությամբ: Այդ ուժերը իրենք ունեն քաղաքական ահի եւ մտահոգության անհրաժեշտություն, թե ինչպես պետք է հանրության համար ձեւակերպեն խնդիրներն այնպես, որ դրանք համարժեք լինեն արագ ընթացող ժամանակին եւ դրա մեջ փոխվող հասարակությանը:


Սուրեն Շահվերդյանը հրաժարական է տալիս

Համազգային թատրոնի գեղարվեստական ղեկավար Սուրեն Շահվերդյանը Ֆեյսբուքի իր էջում գրել է.

Սիրելի Համազգային թատրոնի արտիստներ, սիրելի թատերասեր հասարակություն, ես ողջ կյանքս ապրել ու աշխատել եմ թատրոնում և թատրոնի համար։ Ինձ համար ցավ է տեսնել թատրոնի կաթվածահար վիճակը։ Այսպես շարունակվել չի կարող։ Ես չեմ հանդուրժի թատրոնի քայքայումը։ Տեսնում եմ, որ իմ ներկայությունն ավելի է բարդացնում իրավիճակը, թեև ես իմ ձեռքն էի մեկնել ձեզ՝ համոզված լինելով, որ կարող եմ օգնել և օգտակար լինել, բայց ստացվեց հակառակը…

Այժմ որոշում եմ կայացրել հրաժարվել գեղարվեստական ղեկավարի պաշտոնից։ Ինչպես որ խոստացել էի, ես մնում եմ ձեր բարեկամը, գրկում եմ ձեզ մեկ առ մեկ ու հաջողություն մաղթում ձեր գործում։ Հուսով եմ, որ մեր միջև անախորժությունները կմոռացվեն, կներվեն միմյանց հասցված վիրավորանքները։ Հուսով եմ նաև, որ ապագայում առիթներ կունենանք միասին ստեղծագործելու և ծառայելու Նորին մեծություն Թատրոնին։


ՀԲԸՄ-ն պատրաստ է աջակցել հաջորդ կառավարությանը

Հայկական Բարեգործական Ընդհանուր Միությունը շնորհավորում է Նիկոլ Փաշինյանին` Հայաստանում դեկտեմբերի 9-ի խորհրդարանական ընտրություններում «Իմ քայլը» դաշինքի հաղթանակի կապակցությամբ:
ՀԲԸՄ հայտարարության մեջ ասվում է. «Ժողովրդի հստակ մանդատով և իր օրակարգին սատարող խորհրդարանական պատգամավորների կայուն զորակցությամբ, պարոն Փաշինյանը իրականացրել է հանուն խաղաղ հեղափոխության իր ծրագրի կարևորագույն փուլը:
ՀԲԸՄ-ն վարչապետի պաշտոնակատար Փաշինյանին և նոր խորհրդարանին նշանակալի հաջողություններ է մաղթում համատեղ աշխատանքում՝ ի նպաստ ծառացած մարտահրավերներին լուծումներ գտնելու և հայ ժողովրդի՝ իր
բարձրագույն ներուժը դրսևորելու պայմաններ ստեղծելու գործում:
ՀԲԸՄ-ն շարունակելու է հետևել քաղաքական զարգացումներին և ժողովրդի վրա դրանց ազգեցության համապատկերին: ՀԲԸՄ-ն, համաձայն իր առաքելության, պատրաստ է աջակցելու հաջորդ կառավարությանը կրթության, մարդասիրական ծառայությունների, սոցիալ-տնտեսական զարգացման և մշակութային ծրագրերի
միջոցով, հօգուտ հայ ժողովրդի»:

Էրիկ Գրիգորյանը Համաշխարհային բանկի պաշտոնյային է ներկայացրել կլիմայական ֆինանսավորման հարցերի լուծման ՀՀ-ում մշակված գործիքը

ՀՀ բնապահպանության նախարարի պաշտոնակատար Էրիկ Գրիգորյանը Համաշխարհային բանկի շրջակա միջավայրի և բնական ռեսուրսների տարածաշրջանային տնօրեն Բենուա Բոսկեին ներկայացրել է Հայաստանի կողմից մշակված կլիմայական ֆինանսավորման նորարարական գործիքը: «Արմենպրես»-ի հաղորդմամբ՝ այս մասին Էրիկ Գրիգորյանը գրել է իր «Ֆեյսբուք »-ի էջում:

«Համաշխարհային բանկի շրջակա միջավայրի և բնական ռեսուրսների տարածաշրջանային տնօրեն Բենուա Բոսկեին ենք ներկայացնում Հայաստանի կողմից մշակված կլիմայական ֆինանսավորման նորարարական գործիքը, որը կարող է գլոբալ մեխանիզմ դառնալ զարգացող երկրների կլիմայական ֆինանսավորման հարցերի լուծման համար»,- գրել է ՀՀ բնապահպանության նախարարի պաշտոնակատարը։


Սերգեյ Լավրովն ու Տիգրան Սարգսյանը մտքեր են փոխանակել ԵԱՏՄ-ի միջազգային օրակարգի վերաբերյալ

Ռուսաստանի Դաշնության արտաքին գործերի նախարար Սերգեյ  Լավրովը դեկտեմբերի 10-ին ընդունել է Եվրասիական տնտեսական հանձնաժողովի Կոլեգիայի նախագահ Տիգրան Սարգսյանին:

Ինչպես հաղորդում է «Արմենպրես»-ը, վկայակոչելով Ռուսաստանի արտաքին գործերի նախարարությանը, զրույցի ժամանակ հիմնական ուշադրությունը սևեռվել է Եվրասիական տնտեսական միության (ԵԱՏՄ) մարմիններում 2018 թվականին Ռուսաստանի նախագահության արդյունքների ամփոփմանը:

Հանդիպման ժամանակ տեղի է ունեցել նաև մտքերի փոխանակում ԵԱՏՄ-ի միջազգային օրակարգի վերաբերյալ:

Հանդիպման մասնակիցները արձանագրել են Եվրասիական տնտեսական միության առաջընթացի զարգացումը, միջազգային ասպարեզում կառույցի հեղինակության բարձրացումը և արտասահմանյան գործընկերների հետաքրքրությունը ԵԱՏՄ-ի  հետ համագործակցության հաստատման մեջ:


Նիկոլ Փաշինյանի օրոք Գագիկ Ծառուկյանին չի հաջողվի «ջոկեր» լինել

Գագիկ Ծառուկյանի Բարգավաճ Հայաստան կուսակցությունը երկրորդն է խորհրդարանում, եւ չնայած քվեարկության օրը Ծառուկյանը հայտարարել է, որ չի կարող քննադատել Նիկոլ Փաշինյանին, քանի որ առաջին օրից աջակցում է նրան, միեւնույն է, ստիպված է լինելու ընդդիմադիր հայտարարել իրեն:

Ծառուկյանի համար դժվար է անել դա: Երկար տարիներ նրա կուսակցությունը երկրորդ ուժն էր, ընդ որում, քաղաքական դիրքորոշում երբեք չէր արտահայտում: Լեւոն Տեր-Պետրոսյանը չկարողացավ Ծառուկյանին կպցնել «բուրժուական դեմոկրատիայի» ցուցիչը, եւ նրա համար հատուկ տերմին հորինվեց՝ «չիշխանություն»:

Այդուհանդերձ, Ծառուկյանի այդ դիրքորոշման ֆենոմենն այն է, որ յուրաքանչյուր իշխանության ժամանակ նա կարող էր ջոկեր լինել: Նրա կուսակցության միջոցով նորից խորհրդարան կարող են անցնել քրեական «կորիֆեյները»: Այդուհանդերձ, Ծառուկյանին դժվար ժամանակ է սպասվում խորհրդարանում:

Եթե դատենք Նիկոլ Փաշինյանի նախընտրական ելույթներով եւ փորձագետների կանխատեսումներով՝ կարելի է ուրվագծել նոր խորհրդարանի առաջնահերթ գործողությունները:

Առաջին հարցերից մեկը կարող է դառնալ 2008 թվականի մարտի 1-ի իրադարձություններին քաղաքական գնահատական տալը: Չնայած հարցը քննարկվում է իրավական դաշտում, ձերբակալվել է երկրորդ նախագահը, իրավապահ մարմինները չեն թաքցնում, որ քննչական խմբի նախկին ղեկավար Վահագն Հարությունյանը ոչնչացրել է մարտի 1-ի իրեղեն ապացույցները: Չնայած Հարությունյանին մեղադրանք են առաջադրել ու հետախուզում հայտարարել, փաստը մնում է փաստ, որ ըստ էության իրեղեն ապացույցներ չկան: Այս իրավիճակում նպատակահարմար է խորհրդարանում քաղաքական գնահատական ընդունել մարտի 1-ի դեպքերի վերաբերյալ:

Գագիկ Ծառուկյանն ինչպե՞ս կքվեարկի այդպիսի հայտարարության օգտին: Նա փաստաթուղթ կստորագրի՞, որով նախորդ ռեժիմը, որի մասն էր իր կուսակցությունը, կմեղադրվի սահմանադրական կարգի խախտման, բանակը ժողովրդի դեմ օգտագործելու եւ սպանությունների մեջ:

Երկրորդ կարեւոր հարցը, որը կարող է քննարկման դրվել նոր խորհրդարանում, նախկին ռեժիմների քաղաքական գնահատականն է ընտրությունների կեղծման առումով: Նոր իշխանությունները բազմիցս ակնարկել են, որ նախորդ ընտրություններն անցել են կոպիտ խախտումներով եւ կեղծվել են: Դա, ըստ էության, պետական հանցագործություն է, որը պետք է քաղաքական գնահատական ստանա: Չի բացառվում, որ խորհրդարանին կառաջարկվի նախկին ռեժիմն ուզուրպացիոն գնահատել: Համապատասխանաբար, պետք է անօրինական համարվեն ուզուրպացիայի տարիներին ստացված եկամուտները: Այդ եկամուտների բռնագրավման համար կարող են կիրառվել անցումային արդարադատության տարրեր:

Գագիկ Ծառուկյանը կքվեարկի՞ խորհրդարանի այդ որոշմանը՝ հասկանալով, որ դա կարող է նաեւ իրեն վերաբերել:

Կարող են բազմաթիվ այլ հարցեր լինել, որոնց նոր խորհրդարանը կարող է անդրադառնալ, ի տարբերություն նախորդի: Օրինակ, վերջին շրջանում սկսել են հաճախ խոսել մի շարք միջպետական պայմանագրերի վերանայման մասին, որոնք ստորագրել է նախորդ իշխանությունը՝ ի վնաս Հայաստանի քաղաքացիների:

Գագիկ Ծառուկյանը կողմ կքվեարկի՞ Գազպրոմի կամ Հարավկովասյան երկաթուղու հետ պայմանագրերի վերանայմանը:

Ամեն դեպքում, Գագիկ Ծառուկյանին դժվար թե հաջողվի պահպանել ջոկերի դերը, եթե, իհարկե, դա պետք չլինի նոր իշխանությանը:


Զոհրաբ Մնացականյանն ընդունել է միջազգային դիտորդական առաքելությունների ներկայացուցիչներին

Դեկտեմբերի 10-ին ՀՀ ԱԳ նախարարի պաշտոնակատար Զոհրաբ Մնացականյանն ընդունեց Հայաստանոում խորհրդարանական ընտրությունների դիտորդական առաքելություն իրականացնելու նպատակով Հայաստան այցելած մի շարք պատվիրակությունների ներկայացուցիչներին։

Ինչպես «Արմենպրես»-ին տեղեկացրին ՀՀ ԱԳՆ տեղեկատվության  ու հանրային դիվանագիտության վարչությունից, Զոհրաբ Մնացականյանը և դիտորդական առաքելությունների ներկայացուցիչները գոհունակությամբ արձանագրեցին նախընտրական քարոզարշավի կազմակերպման և խորհրդարանական ընտրությունների անցակման բարձր մակարդակը, մտքեր փոխանակեցին ընտրական գործընթացների հետագա կատարելագործման ուղղությամբ համագործակցության շուրջ։

Հայաստանի արտաքին քաղաքական գերատեսչության ղեկավարն ընդգծեց, որ երկրում օրենքի գերակայության և մարդու իրավունքների պաշտպանության ամրապնդման ուղղությամբ գործադրվող ջանքերը իրականացվում են քաղաքացիական հասարակության ակտիվ մասնակցությանբ, ինչը ամուր հիմք է հանդիսանում երկրում ժողովրդավարակն ինստիտուտների ամրապնդման և դրանց նկատմամբ հանրային վստահոության բարձրացման համար։ Հայաստանի ԱԳՆ ղեկավարը շեշտեց, որ ընտրությունների արդյունքները վերահաստատեցին ժողովրդի կողմից տրված լայն մանդատը և վստահությունը գործող կառավարության հանդեպ, որը չափազանց ոգևորիչ և, միաժամանակ, պարտավորեցնող՝շարունակելու իրականացվող բարեփոխումների գործընթացը՝ միջազգային գործընկերների հետ համագործակցոությամբ։

Զրուցակիցները բարձր գնահատեցին նաև կանանց ակտիվ մասնակցությունը և դերակատարությունն ընտրական գործընթացում։


Ավտովթարի զոհ է դարձել Մարտունու «Զանգակ» հեռուստաընկերության լրագրող Սյոմա Մարկոսյանը

Գեղարքունիքի մարզի Մարտունի քաղաքում 2018 թվականի դեկտեմբերի 10-ի ժամը 14:00-ի սահմաններում ավտովթարի զոհ է դարձել նույն քաղաքի «Զանգակ» հեռուստաընկերության լրագրող Սյոմա Մարկոսյանը:

Ինչպես «Արմենպրես»-ին տեղեկացրին ՀՀ քննչական կոմիտեի Գեղարքունիքի մարզային քննչական վարչությունից, դեպքը տեղի է ունեցել լրագրողի տան մոտակայքում, Ներքին Գետաշեն-Մարտունի միջհամայնքային ճանապարհին, որտեղ Սյոմա Մարկոսյանին մահացու վրաերթի է ենթարկել «Նիսան» մակնիշի ավտոմեքենայի վարորդը: Նա ՀՀ քննչական կոմիտեի Մարտունու բաժին է ներկայացել անձամբ եւ ցուցմունք է տվել քննչական մարմնին: Փաստի առթիվ հարուցվել է քրեական գործ, կատարվում է նախաքննություն:Մարտունու քաղաքապետարանի եւ «Զանգակ» հեռուստաընկերության աշխատակիցների ներկայացմամբ՝ Սյոմա Մարկոսյանը համեստ, հարգված ու գրագետ անձնավորություն էր, երկու երեխայի հայր: Նա Մարտունի քաղաքում բնակություն էր հաստատել 1988 թվականի վերջերին՝ բռնագաղթվելով Ադրբեջանի Դաշքեսանի շրջանից, որտեղ աշխատել էր որպես «Դաշքեսան» շրջանային թերթի լրագրող:«Մարտունի քաղաքը, գործընկերները, Սյոմա Մարկոսյանին ճանաչողները ցնցված են այդ ծանր եղելությունից, հարգված, աշխատասեր ու բարի մարդու կորստյան ցավից: Նա տնից իջել է ծխախոտ առնելու եւ դարձել է չար դիպվածի զոհ»,-«Արմենպրես»-ի հետ զրույցում նշեցին Սյոմա Մարկոսյանի գործընկերները:


Հայաստանում ռուսամետ ընտրազանգված այլեւս չկա. Ինչ այլ միտումներ արձանագրվեցին ընտրությանը

Մեր զրուցակիցն է ընտրական և քաղաքական տեխնոլոգիաների մասնագետ Արմեն Բադալյանը

Պարոն Բադալյան, ինչպե՞ս եք գնահատում նախօրեին տեղի ունեցած ընտրությունները։ ՀՀԿ նախընտրական շտաբի ղեկավար Դավիթ Հարությունյանը նշում է, որ ընտրություններին քաղաքացիների ցածր մասնակցությունը՝ 48,63 տոկոս, պետք է մտահոգի բոլորին։

Սկսենք քաղաքացիների մասնակցությունից. կրկին կրկնվում է այն նույն մանիպուլյացիոն թեզը, ինչ կար Երևանի ավագանու ընտրություններից հետո։ Երբ նշում ենք մասնակցության տոկոսը՝ 48,63 տոկոս, սա գրանցված ընտրողների թվաքանակի 48,63 տոկոսն է, իսկ գրանցված ընտրողները 2.592.479 են, բայց Հայաստանում այսքան ընտրող չկա և չի կարելի այս տոկոսը նշել, պետք է թվաքանակը նշել, որ այսքան մարդ է մասնակցել։ Տոկոսն ընդհանրապես պետք չէ նշել, որովհետև այդ տոկոսը սխալ պատկերացում է տալիս։ Դրանք կարող են նշել այն երկրները, որտեղ արտագաղթը շատ քիչ տոկոս է կազմում, բայց Հայաստանում արտագաղթը շատ մեծ տոկոս է կազմում, իսկ Հայաստանում այդքան ընտրող չի ապրում։

Բացի այդ՝ ՀՀԿ-ն հավաքել է 59059 ձայն, և ՀՀԿ-ի համար խնդիրը ոչ թե շատ մարդ գալն էր, այլ, ընդհակառակը, հնարավորինս քիչ մարդ գալն էր, որովհետև ընդհանուր քիչ թվաքականի դեպքում նրանք անցնում էին։ Եվ ՀՀԿ-ի ռազմավարությունը ճիշտ էր, քանի որ տեսնում ենք, որ շատ քիչ ձայն պակասեց խորհրդարան անցնելու համար։ Մոտավորապես 4,7 տոկոս ձայն են հավաքել, այսինքն՝ իրենց 0,4 տոկոս էր պետք, որ անցնեին խորհրդարան։ Սա միակ ռազմավարությունն էր, որ քիչ մասնակցության դեպքում հնարավոր էր իրենց հաջողություն բերել։ Իսկ քանի որ ընդհանուր մասնակցությունը շատ եղավ, դրա համար նրանց թվաքանակը չբավարարեց։ Եվ հիմա Հանրապետականները պետք է պատասխան տան, թե ինչու էին կատաղի ձևով պայքարում նոր ԸՕ-ի դեմ, քանի որ նոր ԸՕ-ով անցողիկ շեմը դառնում էր չորս տոկոս, և նրանք հաստատ անցնում էին, բայց, չգիտես ինչու, նրանք պայքարում էին նոր ԸՕ-ի դեմ։

Երրորդ՝ ՀՀԿ-ականները ուզեն, թե չուզեն, պետք է իրենց կուսակցության ղեկավարից ազատվեն, որովհետև քանի դեռ այդ կուսակցության ղեկավարը Սերժ Սարգսյանն է, այդ կուսակցությունն ապագա չունի։ Հաջորդ միտումն այն էր, որ ՀՀԿ աջակիցների մոտ այն մտայնությունը կար, որ եթե ՀՀԿ-ն անցնի, բնականաբար, վարչապետի վարկանիշը անկում կունենա և ՀՀԿ-ն ԱԺ-ում, կատաղի քննադատելով վարչապետին, միգուցե մյուս ընտրություններին իր դիրքերն ամրապնդի, կամաց-կամաց ամեն ինչ վերադառնա հին իրավիճակին և հաջորդ խորհրդարանում ՀՀԿ-ն կարող էր ավելի շատ տեղ ունենար, այսինքն՝ Հանրապետականների խորհրդարան մտնելը հույսի վերջին խարիսխն էր։ Հիմա ՀՀԿ-ն խորհրդարան չմտավ, բայց եթե դիտարկում ենք ամբողջ ԱՊՀ տարածքում, կա մի միտում, այն է՝ խորհրդարան չմտած ուժը գրեթե անհավանական է, որ մյուս խորհրդարան մտնի։ Սա չի նշանակում, որ ՀՀԿ-ն չի մտնի հաջորդ անգամ, բայց դա դառնում է խիստ պրոբլեմատիկ, եթե չասենք անհնար է դառնում այս պահի դրությամբ, և ՀՀԿ-ականները հատկապես տեղերում սկսելու են շատ արագ ձևով դուրս գալ ՀՀԿ-ից, քանի որ ՀՀԿ-ն արդեն խորհրդարանում չէ, դառնում է անիմաստ այդ կուսակցությունում մնալը։

Ի՞նչ կարող եք ասել խորհրդարան անցած մյուս ուժերի հետ կապված։ Մասնավորապես գործարարի գլխավորությամբ՝ ԲՀԿ-ն երկրորդ տեղում է։

ԲՀԿ-ն նույնպես ռեբրենդինգի պետք է ենթարկվի։ Գագիկ Ծառուկյանի կենսաբանական տարիքն է մեծանում, և կգա մի ժամանակ, երբ նա այլևս չի կարողանա ակտիվորեն մասնակցել ընտրություններին։ Եվ սա նշանակում է, որ եթե ԲՀԿ-ն չկարողանա ռեբրենդինգի ենթարկել իրեն և Գագիկ Ծառուկյանի՝ նախկինում եղած բարձր հեղինակությունը, որը հիմա բավականին անկում է ապրում, չկարողանա դրան փոխարինող մեկ այլ գաղափար կամ կերպար գտնել, հաջորդ խորհրդարանում հավանաբար չի լինի:

Եվ ամենահետաքրքիրը Լուսավոր Հայաստանն է, որն ըստ նախնական տվյալների՝ ստացավ 6.5%։ Հայաստանում փաստորեն երեք ուժ է անցել, որոնցից երկուսը լիդերային կուսակցություններ են, մեկը գաղափարական կուսակցություն է, որովհետև Լուսավոր Հայաստանին ձեռք չտվեցին ոչ թե այն պատճառով, որ այն ղեկավարվում է Էդմոն Մարուքյանի կողմից, այլ որովհետև Լուսավոր Հայաստանը չափավոր արևմտամետ ուժ է, ու ստացվում է, Հայաստանում քաղաքական կողմնորոշմամբ քվեարկողները արևմտամետ են: Այս սա է հետաքրքիր: Եվ եթե հաշվի առնենք, որ նոյեմբերին Միացյալ Նահանգների հանրապետականների միջազգային ինստիտուտի կողմից անցկացված հարցումների համաձայն Լուսավոր Հայաստանը 18% է ստացել, 10 %-ը հեղինակությունն էր, իսկ հիմա փաստորեն 6.5%, կարող ենք ասել, որ նա տապալեց իր ընտրական քարորզարշավը: Բավական սխալ քարորզարշավ իրականացվեց: Բայց հաշվի առնելով, որ Հայաստանում արևմտամետ ընտրազանգվածը բավական ուժեղ է, և չնայած Լուսավոր Հայաստանի սխալին՝ մարդիկ, այնուամենայնիվ, որպես այլընտրանք գնացին ու ընտրեցին նրան: Այսինքն՝ Հայաստանում գնալով ավելի ու ավելի պահանջարկ է ստանում արևմտամետ գաղափարախոսությունը, և ԼՀ-ն փաստորեն այն կուսակցությունն է, որ կարող է մոբիլիզացնել այդ ընտրազանգվածը իր վրա: Որովհետև պարզ է, որ Հայաստանում ռուսամետ ընտրազանգված, կամ նրանց շահերը պաշտպանող կուսակցություն փաստորեն չկա, և արևմտամետ ընտրազանգվածն է սկսում իշխել: Եվ եթե հաշվի ենք առնում, որ լիդերային երկու կուսակցություններից մեկը մարում է, մյուսը հաստատ մարվելու է, ստացվում է, որ միակ գաղափարաքաղաքական ուժը Հայաստանի ապագա խորհրդարանում արևմտամետ ուժն է դառնալու: Դրա մասին ԼՀ-ն պետք է մտածի: Ես չեմ կարծում, որ սա ԼՀ համար հաղթանակ է, ճիշտ է, անցել է հինգ տոկոսը, բայց դա իր համար հաղթանակ չէր, որովհետև գրագետ քարորզարշավի դեպքում, եթե նաև դրան գումարենք Մենք դաշինքի մոտավորապես երկու տոկոսը, կտեսնենք, որ ԼՀ այս ընտրություններում կարող էր 10-15 տոկոս ստանալ: Բայց ինքն ամբողջովին սխալ քարորզարշավ տարավ, և չնայած այդ սխալ քարորզարշավին՝ ինքը էլի մտավ խորհրդարան, որովհետև փաստորեն արևմտամետ զանգվածը բավական մեծ է Հայաստանում:

Արևմտամետների ձայների քանակն ու կշիռն առաջիկայում մեծանալու է։ Եվ հիմա ով ավելի ակտիվ և գրագետ արևմտամետ քարոզչություն կիրականացնի հենց այսօրվանից սկսած, ապա հաջորդ խորհրդարանում նա առնվազն եթե չի հաղթելու, ապա իշխող քաղաքական ուժի՝ «Իմ քայլի» հետ առնվազն հավասար ձայների հնարավորություն կունենա, իսկ սա նշանակում է ապագայում հնարավոր կոալիցիայի ձևավորում։ Այսինքն՝ Հայաստանի զարգացման վեկտորը, ուզենք թե չուզենք, գնում է դեպի Արևմուտք, և դա ցույց է տալիս նաև քվեարկությունը։

Մյուս քաղաքական ուժերի համար ի՞նչ հնարավորություններ կան ապագայում։

Ինչ վերաբերում է մյուս ուժերին, ՀՅԴ-ն, ինչպես և  կանխատեսում էինք, չանցավ խորհրդարան։ Չնայած ասում էին ՀՅԴ-ն ունի կայուն ընտրազանգված, այո, ունի կայուն ընտրազանգված, բայց ծավալն է բավական պակասում, որովհետև ՀՅԴ-ն վերջին տասը տարվա ընթացքում, լինելով քրեաօլիգարխիկ համակարգում Հանրապետականի կցորդ և քրեաօլիգարխիկ համակարգի մասը, նաև այդ քրեաօլիգարխիկ համակարգին սպասարկող ուժի՝ ՀՀԿ-ի կցորդն է, ամբողջովին կորցրել է իր հայդատական և սոցիալիստական կուսակցության կերպարը և ընդամենը հին անունն է մնացել։ Եվ այդ հին անունն է, որ նրան 3,5 տոկոս ձայն բերեց։ Լուրջ պրոբլեմ ունի ՀՅԴ-ն, իսկ սա նշանակում է, որ եթե ողջ ՀՅԴ վերնախավը հեռանա, հատկապես Հայաստանի ղեկավար գործիչները և նոր կազմ ընտրվի, ինչ-որ չափով դեռևս ունի հնարավորություն վերադառնալու, իսկ թե ինչպես կօգտագործի իր հնարավորությունը, չեմ կարող ասել։

Հետաքրքիր էր Սասնա ծռերի հավաքած բավական քիչ տոկոսը, բայց սա էլ իր բացատրությունն ունի։ Քարոզարշավի կեսից իրենց քարոզարշավի արմատական հեղափոխականությունը սկսեցին միանգամից հետ կանգնելու քաղաքականությամբ, այսինքն՝ իրենց թափը քարոզարշավի կեսից կոտրեցին։ Եվ Սասնա ծռերը նշեցին, որ երկու տարի գործելուց հետո նոր խորհրդարանական ընտրություններ են հարկավոր, անմիջապես վարչապետի կողմից խիստ քննադատության ենթարկվեցին և ընդունեցին այդ քննադատությունը։ Վարչապետի քննադատությունը կոտրեց նրանց, նրանք չուզեցին հակադրվել վարչապետին, սկսեցին վերածվել Իմ քայլի կցորդի։ Բայց բանն այն է, որ Սասնա ծռերին կցորդ չէին դիտում, այլ դիտում էին որպես հայդատական, հակառուսական հռետորաբանությամբ գործող ուժ, նրանք ամբողջովին հետ կանգնեցին նախկինում իրենց տեսակետներից, դարձան մեղմ գծի կողմնակիցներ, իսկ դա իրենց  շատ մեծ վնաս տվեց։

Ինչ վերաբերում է մյուս ուժերին, ՕԵԿ-ի մասին խոսելը պարզապես անիմաստ է,  որովհետև ՕԵԿ-ը ազատ, արդար, թափանցիկ ընտրությունների ժամանակ ցույց տվեց, որ այլևս ապագա չունի Հայաստանում, և ՕԵԿ-ի ղեկավարն այնքան մեծ հակավարկանիշ և հակաընտրազանգված ունի, որ սա երբեք թույլ չեն տա ՕԵԿ-ին ծավալվել։ ՕԵԿ-ն ունի մի քանի ճանապարհ, մասնավորապես նրա ամբողջ ղեկավարությունը պետք է հեռանա և գան նորերը, որը խիստ կասկածելի է, որ տեղի ունենա, բայց անգամ նոր դեմքերի առկայության դեպքում չի երաշխավորում, որ նա ընտրողների ծավալը դրա շնորհիվ կմեծացնի։ Կա երկրորդ ճանապարհը, որ անընդհատ կմասնակցեն ընտրություններին և չեն անցնի, մինչև կուսակցության ղեկավարը կգնա բնական թոշակի։


RSS

Szukaj

Linki

Telefonia

Reklama

Administracja

Group & Page

Back Links

Stats