Jul 21, 2017

Filmy

Książki

Humor

Kuchnia Ormiańksa

Aktualności

Waluta

Armenia

edit SideBar

AsbarezNews

Asbarez English version

RSS feed: Asbarez - Armenian

Աշխարհի Հզօրագոյն Բանակը Ամերիկեանն Է, Իսկ Արաբական Աշխարհինը՝ Եգիպտականը

0714US-ARMYՉԱՐԼԶԹԸՆ.- «Կլոպըլ Ֆայըր Փաուըր» կայքը պատրաստած է երկիրներու զինուորական ուժերուն մասին 2017ի ցուցակը՝ հիմնուելով աւելի քան 50 ազդակներու վրայ:

Ըստ կայքին՝ Եգիպտոս գրաւած է միջազգային գետնի վրայ 10րդ, իսկ արաբական գետնի վրայ՝ առաջին դիրքը։ Անոր կը յաջորդեն Սէուտական Արաբիան (միջազգային գետնի վրայ՝ 22րդ), Ալճերիան (միջազգային գետնի վրայ՝ 23րդ), Սուրիան (միջազգային գետնի վրայ՝ 44րդ), Մարոքը (միջազգային գետնի վրայ՝ 54րդ) եւ Իրաքը (միջազգային գետնի վրայ՝ 59րդ)։

Միջազգային դասաւորման մէջ, ցանկը կը գլխաւորէ Միացեալ Նահանգները, որուն կը յաջորդեն Ռուսիան, Չինաստանը, Հնդկաստանը, Ֆրանսան, Բրիտանիան, Ճափոնը, եւ Թուրքիան: Իսրայէլ կը գրաւէ 15րդ դիրքը, իսկ Իրան՝ 21րդ դիրքը: Ատրպէյճան կը գրաւէ 58րդ դիրքը, Վրաստան՝ 82րդ, իսկ Հայաստան՝ 93րդ դիրքը:


Փենթակոն Կը Դատապարտէ Սուրիոյ Մէջ Ամերիկացի Զինուորներուն Դիրքերը Բացայայտած «Անատոլու»ի Լուրը

0721trk USՈՒԱՇԻՆԿԹԸՆ, «Ա.Էֆ.Փէ.».- Միացեալ Նահանգներու պաշտպանութեան նախարարութեան բանբեր Ատրիըն Ռանքին-Կելըուէյ Յուլիս 19ին զայրոյթով եւ մտահոգութեամբ հակադարձեց հիւսիսային Սուրիոյ մէջ ամերիկեան 10 ռազմական դիրքեր բացայայտող լրատուութիւն մը տարածելու քայլին, զոր կատարեց Թուրքիոյ պետական «Անատոլու» լրատու գործակալութիւնը։

Ան ազդարարեց, թէ նման բացայայտումներ կրնան վտանգի մատնել Սուրիոյ մէջ յատուկ գործողութեանց մասնակցող ամերիկեան ուժերը՝ աւելցնեով, որ այս մտահոգութիւնները արդէն իսկ փոխանցուած են Անգարայի իշխանութեանց։

Ան նաեւ շեշտեց, թէ այժմ աշխատանք կը տարուի՝ բացայայտելու այս լուրին աղբիւրը՝ աւելցնելով. «Շատ մտահոգ պիտի ըլլանք, եթէ ՆԱԹՕի մեր դաշնակիցներէն մէկուն պաշտօնատարները դիտումնաւոր կերպով նման զգայուն տեղեկութիւններ բացայայտած ըլլան՝ վտանգելու համար մեր զինուորները»։

Արդարեւ, «Անատոլու» գրած էր, որ Ռաքքա քաղաքէն մօտաւորապէս 20 մղոն հեռաւորութեան վրայ գտնուող Այն Իսա գիւղին մօտերը հաստատուած են 200 ամերիկացի եւ 75 ֆրանսացի զինուորներ, իսկ ռազմական այս կայաններուն միջոցաւ, ամերիկեան կառավարութիւնը կը զինէ նաեւ քրտական ուժերը:


Իրաքի Քիւրտիստանի Անկախութեան Հանրաքուէն Կրնայ Աղէտալի Հետեւանքներու Առաջնորդել. Զարիֆ

0720Zarif

ԹԵՀՐԱՆ, «Թասս».- Իրանի արտաքին գործոց նախարար Մոհամետ Ճաւատ Զարիֆ յայտարարած է, որ Իրաքի Քրտական ինքնավար մարզին մէջ կայանալիք անկախութեան հանրաքուէն կրնայ աղէտալի հետեւանքներ ունենալ:

«Չենք կարծեր, թէ հանրաքուէն ճիշդ ընտրութիւն մըն է: Մենք կը կարծենք, որ ատիկա պիտի առաջնորդէ Իրաքի մէջ կեդրոնախոյս ուժերու աճին: Ատիկա երկրին համար պիտի ըլլայ աղէտ մը, որ պիտի չսահմանափակուի քիւրտ բնակչութեամբ», յայտարարած է Զարիֆ: «Իրաքի եւ ամբողջ շրջանի ապահովութեան համար, անոր հետեւանքները պիտի ըլլան աղէտալի», աւելցուցած է Իրանի դիւանագիտութեան պետը:

Ան նաեւ նշած է, որ Թեհրան Իրաքի Քիւրտիստանի իր ընկերներուն խորհուրդ տուած է այդ ընտրութիւնը չընել, եւ որ «քիւրտերուն դէմ ուղղուած քաղաքականութիւնը պիտի առաջնորդէ անցանկալի հետեւանքներու»:

Անդրադառնալով Եմէնի տագնապին՝ Զարիֆ ըսած է, որ շրջանի տագնապները կրնան լուծուիլ, եթէ Սէուտական Արաբիոյ եւ Իրանի միջեւ գործակցութիւն տեղի ունենայ: «Իրան չի յուսար, որ Եմէնի մէջ ներկայ տագնապը առաջնորդէ Իրանի եւ Սէուտական Արաբիոյ միջեւ ուղղակի ճակատումի մը», նշած է ան՝ աւելցնելով. «Եմէնի հարցը կրնայ Իրանի եւ Սէուտական Արաբիոյ միջեւ գործակցութեան ենթահող ըլլալ: Եմէնի մէջ ընթացող քաղաքացիական պատերազմին մէջ ոչ մէկ կողմ շահաւոր է»:

Ապա պատասխանելով Սուրիոյ մէջ ընդդիմութեան դէմ քիմիական զէնքի օգտագործման ամբաստանութեան մասին հարցումի մը՝ Զարիֆ ըսած է. «Քիմիական զէնքը մեզի համար կարմիր գիծ մըն է, սակայն խորապէս կը կասկածինք, թէ Խան Շէյխունի վերաբերեալ պնդումները ճիշդ ըլլան»:


Քանի Մը Տողով

Հակառակ այն իրողութեան, որ Աւստրալիոյ նամակաբաշխումի պետական սպասարկութիւնը 2015ին 167 միլիոն տոլարի վնաս կրած էր, 2016ին այդ սպասարկութեան պետը 11 անգամով աւելի վճարուած է, քան՝ երկրի վարչապետը։


Արագածոտնի Մարզպետը Աշխատանքային Առաջին Հանդիպումը Հրաւիրած Է

 

0721ashodsimonian

 

ԱՇՏԱՐԱԿ, «Երկիր».- Արագածոտնի մարզպետ Աշոտ Սիմոնեանի մօտ, Հիմգշաբթի, 20 Յուլիսին  տեղի ունեցաւ աշխատանքային առաջին խորհրդակցական հանդիպումը, որուն մասնակցեցան մարզպետի տեղակալները, աշխատակազմի ղեկավարը, մարզպետի խորհրդականները եւ կառուցուածքային ստորաբաժանումներու ղեկավարները:

Հանդիպման ընթացքին քննարկուեցան կառավարութեան, տարածքային կառավարման եւ զարգացման ու այլ նախարարութիւններու, պետական գերատեսչութիւններու կողմէ ստացուած յանձնարարականներու կատարման ընթացքը: Խմելու եւ ոռոգման ջուրի մատակարարման, համայքներու միաւորման, «Մաքուր Հայաստան» ծրագիրները եւ այլ ոլորտներու առնչուող հարցերը լայնօրէն քննարկուեցան:

Մարզպետ Աշոտ Սիմոնեան անդրադարձաւ արծարծուած հարցերուն եւ նշեց, որ աշխատանքի կազմակերպումը պէտք չէ սահմանափակուի, սոսկ գրաւոր յանձնարարականներու կատարումով, այլ անոնց պէտք է տրուին բովանդակային լուծումներ:


Արցախի Պաշտպանութեան Բանակի Հրամանատարը Կոչ Ուղղած Է՝ «Վառօդը Միշտ Չոր Պահել»ու

0721levonmnatsaganianՍՏԵՓԱՆԱԿԵՐՏ, «Արմրադիօ».- Յուլիս 20ին տեղի ունեցաւ Արցախի Հանրապետութեան պաշտպանութեան բանակի (ԱՀ ՊԲ) ռազմական խորհուրդի հերթական նիստը՝ նուիրուած 2017ի բանակային ուսումնական տարուան առաջին կիսամեակի արդիւնքներու ամփոփման:

ԱՀ ՊՆ մամլոյ ծառայութիւնը կը հաղորդէ, որ ռազմական խորհրուդի նիստին կը մասնակցէին ՊԲ հրամանատարական կազմը, ծառայութիւններու եւ բաժիններու պետերը, միաւորումներու, զօրամասերու հրամանատարներն ու անոնց տեղակալները, ռազմաիրաւապահ մարմիններու ղեկավարները: Ներկայ էր նաեւ Հայաստանի Զինուած ուժերու (Զու) գլխաւոր շտապի պետ, զօրավար Մովսէս Յակոբեան:

Ռազմական խորհուրդի նիստը սկսաւ Արցախի Հանրապետութեան ՊՆ, ՊԲ հրամանատար, զօրավար Լեւոն Մնացականեանի ներածական խօսքով, որուն յաջորդեց ՊԲ հրամանատարի տեղակալներու, միաւորումներու եւ զօրամասերու հրամանատարներու ելոյթներն ու զեկոյցները, որոնցմէ իւրաքանչիւրը անդրադարձաւ իր պատասխանատուութեան տակ գտնուող ոլորտի ձեռքբերումներուն ու թերացումներուն:

Ռազմական խորհուրդի նիստը իր աւարտին հասաւ բանակի հրամանատարի ամփոփիչ խօսքով: Ան, անդրադառնալով հաշուետու կիսամեակին կատարուած աշխատանքներուն՝  համապատասխան յանձնարականներ ու ցուցմունքներ  տուած է երկրորդ կիսամեակի աշխատանքները պատշաճ կերպով կազմակերպելու համար: Զօրավար Մնացականեան նիստի մասնակիցներուն յիշեցուց անկանխատեսելի հակառակորդ ունենալու հանգամանքը, կոչ ուղղելով՝ ոչ մէկ պարագայի թուլացնելու զգօնութիւնը եւ «վառօդը միշտ չոր պահել»ու:


Ծխախոտը Գետին Նետողը Տուգանքի Պիտի Ենթարկուի

0721davitlokian

ԵՐԵՒԱՆ, «Երկիր».- Հինգշաբթի, 20 Յուլիսին, կառավարութիւնը իր նիստին ընթացքին հաստատեց «Մաքուր Հայաստան» գործողութիւններու ծրագիրն ու միջոցառումներու ժամանակացոյցը:

Նիստէն ետք լրագրողներու հետ ճեպազրոյցի մը ընթացքին տարածքային կառավարման եւ զարգացման նախարար Դաւիթ Լոքեան բացատրեց, թէ ինչ կը նշանակէ ծրագիրը իրականացնելու ժամանակ կիրառել կոշտ վարչական կարգադրութիւններ:

«Օրէնքը, որը մենք փոխանցել ենք արդարադատութեան նախարարութիւն, շատ կոշտ մեխանիզմներ է պարունակում: Նուազագոյն տուգանքի չափը 16 հազար դրամ է, խոշոր ձեռնարկութիւնների համար այն հասնում է մինչեւ 200-300 հազար դրամի», ըսաւ Լոքեան՝ աւելցնելով, որ օրինակ, ծխախոտը գետին նետող քաղաքացին 16 հազար դրամի տուգանքի կ՛ենթարկուի:

Լոքեան նշեց, որ «ինչպէս տուգանք են վճարում երթեւեկութեան կանոնների խախտման դէպքում, այնպէս էլ կը տուգանուեն միջավայրը աղտոտելու համար»

Նախարարը նաեւ նշեց, որ յաջորդ տարի շուրջ 10000 աղբաման պիտի գնուի:


Դատաւորը Նախ Ջնջեց, Ապա Կրկին Պատիժ Կիրառեց «Սասնայ Ծռեր»ու Անդամներուն Նկատմամբ

0721sasnadzrerԵՐԵՒԱՆ, «Ազատութիւն».- «Սասնայ ծռեր» զինուած խումբի 18 անդամներու դատաքննութիւնը Հինգշաբթի, 20 Յուլիսին դարձեալ կարելի չեղաւ կայացնել:

Պաշտպան փաստաբաններու քանի մը ժամ տեւած առարկութիւններէն ետք, դատաւորը ջնջեց պատիժը եւ թոյլատրեց դահլիճ բերել բոլոր ամբաստանեալները: Քանի մը  վայր-կեան անց սակայն, կրկին հեռացնելու որոշում կայացուց: Պատճառը դարձեալ ամբաստանեալներու ոտքի չկանգնիլն էր:

Փաստաբանները յայտարարեցին, որ առանց իրենց պաշտպանեալներուն չեն մասնակցիր դատավարութեան:


Ֆրեզնոյի Մէջ Սկսած Են Սարոյեանի Տուն-Թանգարանի Շինարարական Աշխատանքները

0000Saroyan House2ԵՐԵՒԱՆ, «Մեդիամաքս».- «Մտաւորական Զարթօնք» հիմնադրամին նախաձեռնած «Սարոյեանի Տուն» («Saro-yan House») թանգարանի շինարարական աշխատանքները արդէն իսկ սկսած են։

Հռչակաւոր ամերիկահայ գրող Ուիլեըմ Սարոյեանի Ֆրեզնոյի տունը 2016ին աճուրդով գնած «Զարթօնք» հիմնարկը որոշած է այդ տան մէջ հաստատուելիք տուն-թանգարանի բացումը կատարել հեղինակին 110րդ տարեդարձին օրը՝ Օգոստոս 31, 2018ին:

Հիմնադրամը, որ աւելի քան տարիէ մը ի վեր կը զբաղէր Սարոյեանի կեանքին ու ստեղծագործութեան ուսումնասիրութեամբ, «Ստորակէտ» ճարտարապետական գրասենեակին հետ համատեղ կը մշակէ տուն-թանգարանի ծրագիրը:

Աշխատանքները սկսած են բնակարանի արտաքին կառոյցի վերականգնումով:

0000Saroyan House«Փուլիցըր» գրականութեան մրցանակին արժանացած հեղինակին նուիրուած այս տուն-թանգարանը դասական թանգարան մը պիտի չըլլայ, այլ նորագոյն արհեստագիտութեան օգտագործումով՝ այցելուներուն հնարաւորութիւն պիտի տայ աւելի՛ մօտէն ծանօթանալու հեղինակին եւ այն միջավայրին, ուր ան ապրած էր:

Կը ծրագրուի նաեւ 2729 W. Griffith Way հասցէին գտնուող թանգարանը վերածել Սարոյեանի մասին ուսումնասիրութիւններու կեդրոնի մը. հոն պիտի հաւաքուին Սարոյեանի հեղինակած կամ Սարոյեանի մասին գրուած գիրքերը, ինչպէս նաեւ՝ լուսանկարներ, տեսանիւթեր, օրագրային էջեր, նամակներ, անոր գործերուն նախնական օրինակները, գծագրութիւններ, նկարչութիւններ եւ հեղինակին պատկանած այլ իրեր:

Նշենք, որ ներկայիս Սարոյեանի գրական ժառանգին նուիրուած հաւաքածոներ գոյութիւն ունին Սթենֆըրտի համալսարանին եւ Սան Ֆրանսիսքօ հաստատուած՝ Ուիլեըմ Սարոյեանի անուան հիմնարկին մէջ:

Այս ծրագիրին զուգահեռ, «Մտաւորական Զարթօնք» հիմնարկը կը պատրաստէ Սարոյեանի կեանքին եւ ստեղծագործութեանց նուիրուած համացանցային կայք մը՝ saroyanhouse.com հասցէով:


Եւրոպական Ատեանը Հրատապ Կարգով Կը Քննէ Քրտամէտ Կուսակցութեան Ղեկավարներուն Դիմումը

ՊՈԼԻՍ, «Մարմարա».- Մարդկային իրաւանց եւրոպական ատեանը որոշած է հրատապ կարգով քննել Թուրքիոյ քրտամէտ Ժողովուրդներու ժողովրդավարական կուսակցութեան համանախագահներուն՝ Սալահետտին Տեմիրթաշի ու Ֆիկեն Եուքսեքտաղի ներկայացուցած բողոք-դիմումները, եւ արդէն իսկ Անգարայի իշխանութիւններէն յստակացում պահանջած է՝ քրտամէտ կուսակցութեան առաջնորդները բանտարկելու օրինականութեան առնչութեամբ։

Նշենք, որ Տեմիրթաշի եւ Եուքսեքտաղի երեսփոխանական անձեռնմխելիութիւնը Մայիս 2016ին խլուեցաւ, իսկ Նոյեմբեր 4ին, «յանցանք գործելու նպատակով խմբաւորում հիմնելու», «ահաբեկչական խմբաւորման անդամ ըլլալու», «զինեալ յանցախումբի անդամ ըլլալու» եւ «յանցախումբի անունով յանցանք գործելու» հիմնաւորումներով՝ անոնք ձերբակալուեցան։

Քրտամէտ կուսակցութենէն Միթհատ Սանճար իր կարգին նշեց, որ անիմաստ էր այս գծով դիմում կատարել Թուրքիոյ Սահմանադրական դատարանին։ «Թուրքիոյ մէջ դատական համակարգը անկախ չէ ու կը գտնուի մեծ ճնշումներու տակ», ըսաւ ան։

Կ՛ակնկալուի, որ Անգարայի իշխանութիւնները մինչեւ տարեվերջ, իրենց պաշտպանականը ներկայացնեն եւրոպական ատեանին։


RSS

Szukaj

Linki

Telefonia

Reklama

Administracja

Group & Page

Back Links

Stats