Aug 17, 2018

Filmy

Książki

Humor

Kuchnia Ormiańksa

Aktualności

Waluta

Armenia

edit SideBar

AsbarezNews

Asbarez English version

RSS feed: Asbarez - Armenian

Ո՞վ Է Թուրքիոյ Եւ Ամերիկայի Միջեւ Ճգնաժամ Պատճառած Հոգեւորականին Հայ Փաստաբանը

0817cem

ԵՐԵՒԱՆ, «Էրմենիհապեր».- Թուրքիոյ եւ Միացեալ Նահանգներու միջեւ դիւանագիտական լարուածութեան եւ առեւտրական «պատերազմ»ի պատճառ դարձած ամերիկացի հոգեւորական Էնտրու Պրանսընի փաստաբանը ազգութեամբ հայ Ստեփան (Իսմայիլ) Ճեմ Հալաւուրթն է: Ան Թուրքիոյ մէջ ճանչցուած փաստաբան է եւ յատկապէս յայտնի է հայերու վերաբերող դատական գործերուն մէջ իր ներգրաւուածութեամբ: Ան շրջան մը եղած է Տերսիմի հայերու միութեան նախագահը եւ անոր գլխաւորած տերսիմահայերու խումբը մասնակցած էր 2015ին տեղի ունեցած Համահայկական 6րդ խաղերուն:

Հալաւուրթ միայն 17 տարեկանին իմացած է, թէ ինք հայ է: Այնուհետեւ, Տերսիմի հայերու միութիւնը հիմնելէ ետք՝ 2013ին Հայաստանի մէջ մկրտուած է հայկական եկեղեցւոյ մէջ՝ որդեգրելով Ստեփան անունը: Աւելի ուշ, մօտաւորապէս 40 տերսիմահայեր, ներառեալ՝ Հալաւուրթի ընտանիքի անդամները, Հայաստանի մէջ մկրտուած են:

Հալաւուրթ Թուրքիոյ մէջ մասնակցած է քանի մը աղմկայարոյց դատական գործերու եւ կը հանդիսանայ Թուրքիոյ բանակին մէջ 2011ի Ապրիլ 24ին սպաննուած հայ զինուոր Սեւակ Պալըքճըի ընտանիքի եւ 2007ի Յունուար 19ին սպաննուած «Ակօս»ի խմբագրապետ Հրանդ Տինքի ընտանիքի փաստաբաններէն մէկը: Ան յաճախ աչքի կը զարնէ իր ընդդիմադիր հայեացքներով եւ բացայայտ հայամէտ ըլլալով:


Ամերիկա-Թուրքիա Լարուածութիւնը Կը Շարունակուի

ՊՈԼԻՍ, «Մարմարա».- Ամերիկացի հոգեւորական Էնտրու Պրանսընի հարցով ստեղծուած տագնապին իբրեւ հետեւանք կարգ մը ամերիկեան արտադրութիւններու վրայ Թուրքիոյ կողմէ յայտարարուած յաւելեալ հարկերը անհանգստացուցած են Ամերիկայի իշխանութիւնները, որոնք Օգոստոս 15ին առարկած են ու պնդած, որ Թուրքիա սխալ ճամբու վրայ է։

Սպիտակ տան բանբեր Սառա Սենտըրզ, անտեսելով Ամերիկայի կողմէ Թուրքիոյ դէմ յայտարարուած պատժամիջոցները՝ յայտնեց, թէ Թուրքիա սխալ քայլ կ՛առնէ ամերիկեան որոշ արտադրութեանց վրայ նոր տուրքեր հռչակելով, պնդելով, որ Պրանսընը անիրաւ կերպով բանտարկուած է։ Միաժամանակ, Սենտըրզ շեշտեց, որ նոյնիսկ եթէ Պրանսըն ազատ արձակուի, Թուրքիոյ դէմ պատժամիջոցները կրնան շարունակուիլ։ Իսկ պատասխանելով թրքական լիրայի արժեզրկումին եւ Թուրքիոյ դիմագրաւած տնտեսական տագնապին մասին հարցումի մը՝ ան պնդեց, որ ասոնք երկար ատենէ ի վեր շարունակուող գործընթացի մը հետեւանքներն են եւ ոչ թէ ամերիկեան որոշումներուն արդիւնքը։

Իր կարգին, Ամերիկայի փոխնախագահ Մայք Փենս գրած է. «Հայր Պրանսըն Թուրքիոյ մէջ ձերբակալուած անմեղ մարդ մըն է եւ դատական կանոններու համաձայն՝ ան ազատ արձակուած պէտք է ըլլար։ Թուրքիա պէտք չէ հարցականի տակ առնէ Թրամփի վճռականութիւնը։ Մենք ալ ամէն ինչ պիտի ընենք, որպէսզի Պրանսըն Ամերիկա, ի՛ր եկեղեցին վերադառնայ»։


Քանի Մը Տողով

– Վերջին 5 տարիներուն, ամերիկացիները մտահոգող գլխաւոր հարցը առողջապահական սպասարկութիւններու ապահովումն է։

– Միացեալ Նահանգներու տարածքին առաջին անգամ բնակարան գնողներուն 18 տոկոսը ամուրի կիներ են, իսկ 7 տոկոսը՝ ամուրի տղամարդիկ։

– Խորհրդարանական կամ քաղաքապետական ընտրութիւններուն յաղթանակ արձանագրած կին թեկնածու մը երկու անգամ աւելի մեծ հաւանականութիւն ունի ամուսնալուծելու, քան նման ընտրութիւններու ընթացքին պարտութիւն կրած կին թեկնածու մը։

– 30 տարիքը չբոլորած շուէտացիներուն աւելի քան 20 տոկոսը մսակեր չէ՛։


Ամերիկեան Մամուլը Կը Հակադարձէ Քննադատութիւն Մերժող Թրամփի Յարձակումներուն

0817press

ՊՈՍԹԸՆ, «Էյ.Փի.».- Նախաձեռնութեամբ «Պոսթըն Կլոպ» թերթին, Հինգշաբթի, Օգոստոս 16ին ամերիկեան մօտաւորապէս 350 օրաթերթեր իրենց խմբագրականները նուիրեցին խօսքի ազատութեան պաշտպանութեան՝ քննադատելով «կեղծ լուրեր»ու դէմ նախագահ Տանըլտ Թրամփի սկսած խաչակրութեան եւ իր այն պնդումներուն, թէ լրագրողները «ժողովուրդի թշնամին»ներ են:

«Պոսթըն Կլոպ»ի խմբագրականին մէջ կը շեշտուի, թէ Թրամփի շարունակական յարձակումները վնաս կը հասցնեն մամլոյ ազատութեան՝ յիշեցնելով նախագահին, թէ «Միացեալ Նահանգներու հզօրութիւնը կախեալ է խօսքի ազատութենէն»:

Մամլոյ այս արշաւին միացած են Մէյնէն մինչեւ Հաուայիի մէջ լոյս տեսնող թերթեր, ներառեալ շարք մը թերթեր, որոնք 2016ի ընտրութիւններուն ժամանակ նեցուկ կանգնած էին Թրամփին։

Սպիտակ տան ղեկավարի պաշտօնը ստանձնելէ ի վեր, Թրամփ կոշտ կերպով կը քննադատէ զինք քննադատող լրատուամիջոցները՝ պնդելով, որ անոնք շինծու տեղեկութիւն կը տարածեն:

Այօուայի մէջ լոյս տեսնող «Տէ Մոյն Ռեճիսթըր»ը կը գրէ, թէ «ժողովուրդին եւ ժողովրդավարութեան իսկական թշնամիները անո՛նք ենք, որոնք կը փորձեն լռութեան մատնել լրաբերը», իսկ «Ֆայէթվիլ Օպզըրվըր»ը (Հիւսիսային Քարոլայնա) յոյս կը յայտնէ, թէ Թրամփի համակիրները վերջապէս կը գիտակցին, թէ իրականութիւնները շրջողը ինքնին նախագա՛ն է, որ այդ մօտեցումով կը փորձէ իր շահերը պաշտպանել։

0817brennan.jpg

Ճան Պէենըն

Իր կարգին, Սէյնթ Լուիսի մէջ լոյս տեսնող «Փոսթ-Տիսփեչ»ը «իսկակա՛ն հայրենասէրներ» կը կոչէ լրագրողները, իսկ «Շիքակօ Սան Թայմզ»ը կը գրէ, թէ ամերիկացիներուն մեծ մասը գիտէ, որ Թրամփի պնդումները անհեթեթութիւններ են:

Յատկանշական է, որ այս արշաւը տեղի ունեցաւ այն օրը, երբ Թրամփ «Սի.Այ. Էյ.»ի նախկին տնօրէն Ճան Պրենընէն խլեց գաղտնի տեղեկութեանց ծանօթանալու իրաւասութիւնը, պարզապէս որովհետեւ ան յաճախ կը քննադատէ Թրամփի քայլերը։

Պրենըն դատապարտեց «զինք քննադատողները լռեցելու համար տրուած եւ քաղաքական նպատակներ հետապնդող» Թրամփի որոշումը՝ աւելցնելով, թէ կասկած չկայ, որ Թրամփի ընտրապայքարը գործակցած է Ռուսիոյ հետ, իր յաղթանակը ապահովելու համար, եւ որ այժմ միայն կը մնայ փաստել, թէ արդեօք այդ գործակցութիւնը դաւաճանութեան մակարդակի կը հասնի՞։


Ռոպերթ Քոչարեան Յայտարարեց Քաղաքականութիւն Վերադառնալու Մասին

0817kocharian

ԵՐԵՒԱՆ, «Արմէնփրէս».- Նախկին նախագահ Ռոպերթ Քոչարեան, Հինգշաբթի, 16 Օգոստոսին, «Երկիր Մեդիա» հեռատեսիլի կայանին տուած իր բացառիկ հարցազրոյցին ընթացքին յայտարարեց իր՝ քաղաքականութեան դաշտ վերադառնալուն մասին, թէեւ՝ առանց ձեւաչափի յստակացումի: Միեւնոյն ժամանակ, պաշտօնաթող նախագահը կոչ ըրաւ բացայայտելու նախաքննական գաղտնիքը՝ Մարտ 1ի գործի դատաքննութեան ընթացքին: Իր կարծիքով՝ պաշտպան փաստաբաններու խումբը «ջախջախել է» մեղադրանքը, որ, ըստ Քոչարեանի, կառուցուած է կեղծ եզրակացութիւններու վրայ:

Ան քաղաքականութիւն պիտի վերադառնայ իբրեւ անհա՞տ, թէ պիտի փորձէ քաղաքական ուժի ձեւաւորման մասին մտածել… Քոչարեան այս հարցումին պատասխանեց՝ ըսելով. «Այդ վերադարձը կարող է լինել տարբեր ձեւաչափերով»: Ըստ իրեն՝ իր վերադարձը պայմանաւորուած է աշխարհաքաղաքական բարդ իրավիճակով:

«Նայէք՝ ո՞ւր է Հայաստանը եւ ի՞նչ երկրներով ենք շրջապատուած, նաեւ նայէք մեր յարաբերութիւններին՝ այդ երկրների հետ», ըսաւ Քոչարեան՝ պարզաբանելով, որ ներկայիս ռուս-ամերիկեան յարաբերութիւնները ամենացած մակարդակի վրայ են, Ամերիկա-Իրան յարաբերութիւնները՝ նոյնպէ՛ս, իսկ Թուրքիան ընդհանրապէս յարձակողական կեցուածք ընդունած է:


7 Ամսուան Ընթացքին Հաւաքուած Է Այնքան Հարկ, Որքան Կը Նախատեսուէր Հաւաքել Ամբողջ Տարուան Ընթացքին

0817taxes

ԵՐԵՒԱՆ, «Արմէնփրէս».-  Հինգշաբթի, 16 Օգոստոսին, կառավարութեան նիստէն ետք, Պետական եկամուտներու կոմիտէի (ՊԵԿ) նախագահ Դաւիթ Անանեան լրագրողներու յայտնեց, որ ընթացիկ տարուան առաջին 7 ամիսներուն հաւաքուած է առաւել՝ քան ամբողջ տարուան համար նախատեսուած հարկային եկամուտները:

«7 ամսուայ ընթացքում հաւաքագրել ենք այնքան աւելի եկամուտ, որը նախատեսւում էր ամբողջ տարուայ ընթացքում: 2018ի համար ի սկզբանէ նախատեսուած էր հաւաքագրել 107 մլրդ. դրամով աւելի հարկային եկամուտ, այդ սահմանաչափին հասել ենք 7 ամսուայ ընթացքում», ընդգծեց ՊԵԿի նախագահը:


Չի Կրնար Հակամարտութեան Գլխաւոր Կողմը Հեռացուած Ըլլալ Բանակցութիւններու Սեղանէն. Աշոտ Ղուլեան

 

0817ashodghulian

ՍՏԵՓԱՆԱԿԵՐՏ.- Արցախի Հանրապետութեան՝ բանակցութիւններուն չմասնակցիլը կը խօսի այն մասին, որ Ատրպէյճան պատրաստ չէ Ղարաբաղի հիմնահարցի գծով կարգաւորման երթալու:

Ըստ «Արցախփրէս»ի՝ խօսելով Արցախի Հանրապետութեան բանակցային գործընթացին մասին, նման տեսակէտ յայտնեց Արցախի Հանրապետութեան Ազգային ժողովի նախագահ Աշոտ Ղուլեան:

«Բանակցային գործընթացին մէջ, դժբախտաբար, ոչ այնքան լաւ ժամանակներ են այս պահուն: Մեզի համար փակուղային իրավիճակ է եւ շատ դժուար է կանխատեսել, թէ ի՛նչ լրացուցիչ զարկերակներով կարելի է խթանել բանակցային գործընթացը: Մենք ունինք երկու հիմնական հարցեր, որոնցմէ մէկը խորքային է՝ բանակցային գործընթացին մէջ շատոնց խախտած է ձեւաչափը: 1997-1998 թուականներէն ետք, բանակցային ձեւաչափը աղճատուած է, այսինքն Արցախի Հանրապետութիւնը չի մասնակցիր բանակցութիւններուն, ապա բանակցութիւնները ընդհանրապէս փոխած են իրենց ընդհանուր կառուցուածքը եւ, եթէ մինչ այդ բանակցութիւններ տեղի ունեցած են աշխոյժ երկխօսութեան ճանապարհով, այսօր, սակայն, ամէն ինչ փոխուած է՝ անցած են մաքոքային դիւանագիտութեան, այսինքն՝ միջնորդները այցելութիւն կու տան բոլոր կողմերուն», յայտնեց Ղուլեան:

Ազգային ժողովի նախագահը նաեւ առանձնացուց այլ հարց մը. «Ատրպէյճան կը փորձէ հարցի սրացումներ ձեռնարկել Հայաստանի հետ սահմանի տարբեր կէտերու վրայ: Այս ամէնը միջոցներ են՝ արդարացնելու ատրպէյճանական այն կարծրատիպը, որմով կը փորձեն ցոյց տալ, թէ հարցը հայաստանա-ատրպէյճանական է: Բացի եռակողմ հանդիպումէն, կը կարծեմ, այլ տարբերակ չի կրնար ըլլալ, որովհետեւ շատոնց ղարաբաղեան հիմնահարցի բանակցային գործընթացը պաշտօնապէս հաստատուած է փաստաթուղթերով՝ ամենաբարձրը ԵԱՀԿի Պուտափէշտի գագաթնաժողովն է», նշեց Ղուլեան:

Ան վստահեցուց, որ կան փաստաթուղթեր, որոնց համաձայն՝ Արցախի Հանրապետութեան մասնակցութիւնը բանակցային գործընթացին անհերքելի է: Բանակցութիւններուն Արցախի մասնակցութեան հարցին՝ Ատրպէյճանի պատասխանէն շատ պարզ կը դառնայ, թէ իրենք կ՛ուզեն իրական կարգաւորում, թէ կը փորձեն են յետաձգել հիմնահարցին կարգաւորումը: «Չի կրնար հակամարտութեան գլխաւոր կողմը հեռացուած կամ մէկ կողմ քաշուած ըլլալ բանակցութիւններու սեղանէն», ըսաւ Աշոտ Ղուլեան:

Նշենք, որ Հայաստանի վարչապետ Նիկոլ Փաշինեան, Մայիսին Արցախի մէջ տեղի ունեցած ասուլիսին ընթացքին ըսած էր, որ Լեռնային Ղարաբաղի հակամարտութեան կարգաւորման համար ամենակարեւոր մասը կը համարէ ճիշդ ձեւաչափով բանակցութիւնները, որոնց պէտք է անպայման մասնակցութիւն ունենայ նաեւ Արցախը:


Սասուն Խաչատրեան Ներկայացուց Ռոպերթ Քոչարեանը Ազատ Արձակելու Որոշման Ապօրինութեան Հիմքերը

0817sassoun

ԵՐԵՒԱՆ, «Արմէնփրէս».- Յատուկ քննչական ծառայութեան (ՅՔԾ) պետ Սասուն Խաչատրեան մանրամասնեց ծառայութեան տարածած յայտարարութիւնը այն մասին, որ Հայաստանի երկրորդ նախագահ Ռոպերթ Քոչարեանի խափանման միջոցը վերացնելու Վերաքննիչ դատարանի որոշումը ապօրինի է, իսկ Վերաքննիչ դատարանը դուրս եկած է իր լիազօրութիւններու շրջանակներէն:

Կառավարութեան Հինգշաբթի օրուան նիստէն ետք, Սասուն Խաչատրեան լրագրողներու յայտնեց, որ այդ որոշումը կայացուած է բացարկման ենթակայ դատաւորի մը կողմէ, այսինքն՝ հարցը քննուած է դատարանի ոչ-օրինական կազմով:

«Դատաւոր Ալեքսանդր Ազարեանը նիստի մեկնարկին յայտարարել է, որ ինքն աշխատել է երկրորդ նախագահի աշխատակազմում, նաեւ յայտարարել է, որ թէեւ աշխատել է, սակայն այս գործի քննութեան հետ կապուած կաշկանդուածութիւն չունի: Ես չէի խօսի նրա անկողմնակալութեան մասին, եթէ լինէր միայն այս փաստը: Նա պէտք է այս գործով ինքնաբացարկ յայտնէր, որովհետեւ նա Մարտի 1ի գործերով կայացրել է 9 մեղադրական վճիռ: Եւ այնպիսի ձեւակերպումներով, որոնցով մարդիկ դատապարտուել են: Նա այդ դատավճիռներում խաղաղ ցուցարարներին բնութագրել է որպէս ամբոխ, որպէս զանգուածային անկարգութիւնների մասնակից, ովքեր հրկիզել են, ջարդել են: Այսինքն, նա այդ համոզմունքի կրողն է, եւ այդ պարագայում նա պարտաւոր էր ինքնաբացարկ յայտնել: Եթէ չէր յայտնում ինքնաբացարկ, նա պարտաւոր էր այս փաստերի մասին բարձրաձայնել, որից յետոյ ես համոզուած եմ, որ դատախազութեան ներկայացուցիչները նրան ինքնաբացարկի միջնորդութիւն կը ներկայացնէին, իսկ ՀՔԾ ներկայացուցիչները որոշ յայտարարութիւններով հանդէս կը գային», մանրամասնեց Խաչատրեան:

Ան աւելցուց, որ Ալեքսանդր Ազարեան, օգտուելով այն հանգամանքէն, որ Վերաքննիչ դատարանի նախագահը գտնուած է արձակուրդի մէջ, իսկ ինք ժամանակաւորապէս կատարած է դատարանի նախագահի պարտականութիւնները, մակագրած է այս գործը ինքն իրեն, կողմերուն տեղեակ չէ պահած, որ ինք Մարտ 1ի գործով վերը նշուած ձեւակերպումներով մարդիկ դատապարտած է:

«Այսինքն, չյայտնելով այն մասին, որ ինքն արդէն իսկ կանխակալ վերաբերմունք ունի այս գործի, այդ դէպքերի վերաբերեալ, նա այս գործով որոշում է կայացրել: Ես կարծում եմ, որ այս դատաւորը կանխակալ կարծիք է ունեցել, այսինքն՝ հարցը քննուել է դատարանի ոչ-օրինական կազմով, որը այդ վճիռը բեկանելու հիմք է», ըսաւ ՀՔԾ պետը:


Մարտ 1ի Հարցով Պիտի Հարցաքննուի Նաեւ Սերժ Սարգսեանը

 

0817serj

ԵՐԵՒԱՆ.- Մարտ 1ի հարցով պիտի հարցաքննուի նաեւ Սերժ Սարգսեանը, կառավարութեան նիստէն ետք յայտարարեց Հայաստանի Յատուկ քննչական ծառայութեան պետ Սասուն Խաչատրեան։ «Պիտի հարցաքննուին բոլոր անոնք, որոնք այս գործին հետ առընչութիւն ունեցած են, բոլորը՝ առանց բացառութեան: Պիտի հարցաքննուի նաեւ Սերժ Սարգսեանը»:

Պատասխանելով հարցումին, թէ ե՛րբ կը հարցաքննուի երրորդ նախագահը՝ Սասուն Խաչատրեան ըսաւ. «Մեկնելով քննութեան անհրաժեշտութենէն՝ այդ մէկը կ՛որոշէ քննիչը: Քննիչը կ՛որոշէ, թէ զո՛վ, ե՛րբ եւ ի՞նչ հարցերու շուրջ կը հարցաքննէ: Անիկա քննութեան թաքթիք է, եւ քննիչը ինք պէտք է ծրագրէ իր գործողութիւնները, որպէսզի հարցաքննութիւնը ըլլայ արդիւնաւէտ: Հարցաքննութիւնը ինքնանպատակ չէ, հարցաքննութեան նպատակը որոշ տուեալներ ձեռք բերել է»:


Հայաստանի Ֆութպոլի Հաւաքականը Կր Գրաւէ 100րդ Հորիզոնականը

0817soccer

ԵՐԵՒԱՆ.- ՖԻՖԱն Հինգշաբթի, 16 Օգոստոսին հրապարակեց ազգային հաւաքականներու դասակարգման վարկանշային ցանկը, զոր կը գլխաւորէ աշխարհի նորընծայ ախոյեան Ֆրանսան:

Հայաստանի հաւաքականը կը գրաւէ ցանկին 100րդ հորիզոնականը:


RSS

Szukaj

Linki

Telefonia

Reklama

Administracja

Group & Page

Back Links

Stats